|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 177 Hüküm no: 129 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe Hanım’ın kocası Hüseyin Paşazâde Ahmed Efendi’nin eş-Şeyh Osman Efendi vakfına olan borcuna karşılık rehin verdiği menzilini, borcunu ödeyerek geri aldığı
Fekk-i rehin Husûs-ı âti’l-beyânın mahallinde tahrîri iltimâs olunmağın savb-ı şer‘den irsâl olunan Mevlânâ Brusî Hüseyin Efendi mahmiye-i İstanbul’da ( ) mahallede, kıdvetü’l-meşâyih ve’l-vâ‘izîn hâlâ Ayasofya-i kebîr vâ‘izî olup zikri âtî vakfına nâzır olan eş-Şeyh Osman Efendi b. Mustafa Ağa’nın sâkin olduğu menzile varıp zeyl-i kitâbda isimleri mastûr müslimîn huzûrunda akd-i meclis-i şer‘-i hatîr eyledikde müşârün-ileyh eş-Şeyh Osman Efendi’nin vakf eylediği akçeye ber vech-i meşrûtiyyet mütevellî olan fahrü’l-müderrisîn Ali Efendi b. Osman ile nâzır-ı müşârün-ileyh Osman Efendi meclis-i ma‘kūd-ı mezbûrda, sâbıkan Budin Beylerbeyisi olup ba‘dehû vefât eden Osman Paşa’nın sulbiye kebîre kızı fahrü’l-muhadderât tâcü’l-mestûrât aliyyetü’z-zât hâfızatü’l-kitâb Ayşe Hanım tarafından husûs-ı âtîye vekîl olan Ali Ağa b. Ramazan mahzarında ikrâr ve takrîr-i kelâm edip mukaddemâ müvekkile-i müşârün-ileyhâ Ayşe Hanım’ın zevci iken vefât eden Hüseyin Paşazâde Ahmed Efendi tevliyyet ve nezâretimiz hasebiyle yedimizden vakf-ı mezbûrdan karz eylediği beş bin riyâlî guruşa müşârün-ileyhâ Ayşe Hanım emr ve kabûlü hâviye kefîl olmağla mahmiye-i merkūmede Sancakdar Hayreddin mahallesinde vâki‘ lede’l-ahâlî ma‘lûmü’l-hudûd mülk menzilinin dâhiliyyesini meblağ-ı mezbûr mukābelesinde bize rehin ve teslîm biz dahi irtihân ve tesellüm etmiş idik. El-hâletü hâzihî tevliyyet ve nezâretimiz hasebiyle tamâmen alıp kabz etmekle fekk-i rehin edip meblağ-ı mezbûrdan bir akçe ve bir habbe bâkī kalmadı. Min ba‘d menzil-i mezbûra mülkiyyet üzre mutasarrıfe olsun dediklerinde, gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Muharrem b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem sene 1073.
Şuhûdü’l-hâl: El-Hâc Halil b. Mehmed, Mehmed Çelebi el-Hâc Derviş, Mehmed Çelebi b. Osman, Eyüb Halîfe b. Süleyman el-Müezzin, Mustafa Çelebi b. Ahmed, Mehmed Çavuş b. Hüseyin el-Mübâşir, Mustafa Efendi, Şaban Çavuş b. Receb.
|