|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 178 Hüküm no: 130 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Baba Yasef v. Dimitri’nin Belaş v. Mihal’deki alacağına Furtese bt. Andriye ile Belase bt. Yamandi’nin kefil olduğu
İkrâr-ı kefâlet Mahmiye-i İstanbul’da Abdi Subaşı mahallesinde sâkin Baba Yasef v. Dimitri meclis-i şer‘de mahrûse-i Galata a‘mâlinden Büyükdere nâm karye sâkinelerinden olup kendi tarafından asâleten ve gāib ani’l-meclis sadriyye kebîre kızı Belase bt. Yamandi tarafından husûs-ı âtîye sâbitü’l-vekâle vekîl olan Furtese bt. Andriye nâm nasrâniyye mahzarında takrîr-i kelâm edip mezbûre Furtese’nin dâmâdı olup bundan akdem hâlik olan Belaş v. Mihal nâm zimmînin zimmetinde cihet-i karzdan yüz otuz beş riyâlî guruş hakkım olup meblağ-ı mezbûrun yirmi guruşunu merkūmun yedinden ahz u kabz edip bâkī yüz on beş riyâlî guruşuna mezbûre Furtese ile müvekkilesi merkūme Belase ma‘an emr ve kabûlü hâviye kefâlet-i sahîha ile kefîl olmuş idi hâlâ vekîl-i mezbûre Furtese’den suâl olunup takrîr tahrîr olunmak murâdımdır dedikde gıbbe’s-suâl mezbûre Furtese cevâbında meblağ-ı mezbûr yüz on beş guruşa müvekkilem mezbûre ile ma‘iyyet üzre kefîl olmuş idik deyû bi tav‘ihâ ikrâr etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene selâse ve seb‘în ve elf min hicreti men lehü’l-izz ve’ş-şeref.
Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Osman Çavuş el-Mübâşir, Ahmed Beşe b. Abdullah, Mehmed b. Ramazan, Simo v. Yani attâr, Kostantin v. Toma, Gırali v. Nikola, Yani v. Laskari, Lanpari v. Kosta.
|