|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 179 Hüküm no: 131 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe Hanım bt. Osman Paşa’nın menzilini eski kocası Mehmed Bey b. İsâ’ya sattığı
Mülknâme Husûs-ı âti’l-beyânın mahallinde tahrîri için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Sancakdar Hayreddin mahallesinde kıdvetü’l-muhadderât zübdetü’l-muvakkarât Ayşe Hanım bt. el-merhûm Osman Paşa’nın sâkine olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde müşârün-ileyhâ Ayşe Hanım zâtı mahalle-i mezbûre sükkânından el-Hâc Halil Çelebi b. Mehmed ve Ali Efendi b. Osman ta‘rîfleri ile mu‘arrefe oldukdan sonra meclis-i ma‘kūd-ı mezbûrda zevci râfi‘ü’l-kitâb fahrü’l-ümerâ’i’l-kirâm Mehmed Bey b. İsâ mahzarında bi tav‘ihâ ikrâr ve takrîr-i kelâm edip mahalle-i mezbûrede vâki‘ bir tarafı ba‘zan mahalle-i mezbûre mescid-i şerîfine ve ba‘zan Abdülhalim Çelebi tasarrufunda olan vakıf menzile ve bir tarafı ba‘zan Hasan Efendizâde İbrahim Çelebi tasarrufunda olan vakıf menzile ve ba‘zan tarîk-i âma ve iki tarafı dahi tarîk-i âma müntehî, hâriciyyesini tabaka-i ulyâda üç bâb fevkānî oda ve iki sofa ve bir kenîf ve bir taş musluk ve tabaka-i vustâda altı bâb oda ve bir kenîf ve tabaka-i süflîde bir ahır ve def‘a beş bâb fevkānî oda ve tahtında bir ahır ve bir kebîr matbah ve bir su kuyusu ve bir kenîf ve bir arpa anbarı ve bir kebîr ve bir sagīr iki sokak kapısı ve bir havuz ve bir köşk ve üç bahçe odası ve bir kameriye ve bir kaygan sofa ve def‘a bir su kuyusu ve zât-ı eşcâr-ı müsmire ve gayr-ı müsmire bahçe ve dâhiliyyesi fevkānî iki bâb oda ve iki şehnişînli bir bâb fevkānî oda ve iki sofa ve tahtânî iki bâb oda ve bir sofa ve üç kenîf ve kapı kurbunda bir bâb tahtânî oda ve bir matbah ve yine iki bâb tahtânî oda ve iki sofa ve bir hamam ve bir câmekân ve bir tatlı su kuyusu ve iki acı su kuyusu ve iki taş musluk ve bir harem kapısı ve iki tarafdan taş nerdübân ve zât-ı eşcâr-ı müsmire ve gayr-ı müsmire bahçeyi müştemil mülk menzilimin hâriciyyesini, mukaddemâ zevcim müşârün-ileyh Mehmed Bey’e dört bin kıt‘a riyâlî guruşa bey‘ ve teslîm ve kabz-ı semen eylemiş idim hâlâ dâhiliyyesini dahi müşârün-ileyh Mehmed Bey’e beş bin kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr beş bin kıt‘a riyâlî guruşu müşterî-i müşârün-ileyh Mehmed Bey yedinden tamâmen ahz u kabz eyledim ba‘de’l-yevm menzil-i mahdûd-ı mezbûrun hâriciyye ve dâhiliyyesi müşârün-ileyhin mülk ve müşterâsıdır benim kat‘â alâka ve medhalim yoktur dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Abdi b. Mahmud ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mu‘azzam li sene selâse ve seb‘în ve elf.
Şuhûdü’l-hâl: Mustafa Efendi b. Mehmed Efendi el-İmâm, el-Hâc Halil b. Mehmed, Mustafa Ağa b. Hızır, Ahmed Çelebi b. Mehmed er-Râcil, Eyüb Halîfe b. Süleyman, Mehmed Ağa b. Hüseyin, Ali Çelebi b. Ramazan, Mehmed Çelebi b. Mustafa, Abdi Çelebi b. Mahmud, Sinan Beşe b. Abdullah er-Râcil, İsmail Çelebi b. Kasım, el-Hâc Mehmed b. Halil, Beşir b. Mahmud, Şâhin b. Abdullah.
|