.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 180
Hüküm no: 132
Orijinal metin no: [11a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kirkor v. Yako’nun bağlarını ve tarlalarını sattığı Karabet v. Feros ile karındaşlarınden alacağı kalmadığı

İsbât-ı def‘-i semen Ekmekçi tâifesinden Kirkor v. Yako nâm Ermeni meclis-i şer‘de Karabet v. Feros nâm Ermeni muvâcehesinde üzerine da‘vâ edip mezbûr Karabet ve karındaşları gāibûn ani’l-meclis Asadur ve Dasnik ve Nikogos nâm Ermeniler ber vech-i iştirâk-i seviy mülk-i mevrûsları olup karye-i mezbûre dâhilinde vâki‘ lede’l-ahâlî ma‘lûmü’l-hudûd üç kıt‘a bağ ile mülk ceviz eşcârı (...) [11b] safka-i vâhide ile altmış riyâlî guruşa bana bey‘ ve teslîm ve tasarruflarında olan lede’l-ahâlî ma‘lûmü’l-hudûd dört kıt‘a tarla ile bir kıt‘a bostan yerini sâhib-i arz izni ile bana ferâğ ve tefvîz eylediklerinden sonra, semen-i mezbûr altmış riyâlî guruş ile bedel-i mezbûr elli riyâlî guruş ki cem‘an yüz on kıt‘a riyâlî guruşdan her biri hissesine isâbet eden yirmi yedi buçuk riyâlî guruşu benden alıp kabz eylediklerinden sonra, mezbûr Karabet ol bağlar ile tarlaları tasarrufuma mâni‘ olur suâl olunsun dedikde gıbbe’s-suâl mezbûr Karabet cevâbında fi’l-vâki‘ ol bağlar ile ol tarlaları mezbûr Kirkor’a bey‘ ve teslîm ve ferâğ eyledik. Lâkin semen ile bedel olan cem‘an yüz on guruşdan kendi hisseme isâbet eden yirmi yedi buçuk guruşun ancak on iki buçuk guruşunu alıp kabz etmekle tasarrufuna mâni‘ olurum deyip bey‘-i mezbûr ile ferâğ-ı mezbûru ikrâr ve kendi hissesi olan yirmi yedi buçuk riyâlî guruşa tamâmen kabzını inkâr eyledikde müdde‘î-i mezbûrdan müdde‘âsı için beyyine taleb olundukda udûl-i müslimînden Hüseyin b. Ahmed ve Ali b. Ahmed nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ mezbûr Karabet ve karındaşı gāibûn ani’l-meclis merkūmun Astador ve Dasnik ve Nikogos zikr olunan bağlar ile tarlaları mezbûr Kirkor’a yüz on riyâl[î] guruşa minvâl-i muharrer üzre bey‘ ve teslîm ve ferâğ ve tefvîz edip semen ile bedel olan yüz on riyâlî guruşdan her biri hisselerine isâbet eden yirmi yedi buçuk riyâlî guruşu huzûrumuzda mezbûr Kirkor’dan aldıklarında mezbûr Karabet dahi hissesine isâbet eden yirmi yedi buçuk riyâlî guruşunu mezbûr Kirkor’dan alıp kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mezbûr Kirkor Ermeni’nin tasarrufuna mâni‘ olmamak için mezbûr Karabet Ermeni’ye tenbîh olundukdan sonra mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem sene 1073.


Şuhûdü’l-hâl: Fahrü’l-kuzât Abdülbâkī Efendi, Brusî Hüseyin Efendi el-Kâtib, Şükrullah Bey el-Muhzır, Abdi Çelebi b. Hüseyin el-Muhzır, Mehmed b. Ramazan el-Muhzır, Karabet v. Kurt, Karanil v. Asadur.