|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 181 Hüküm no: 133 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ermeni Nikogos v. Sadet’in yanan vakıf menzil arsasına bina inşâsına Meryem bt. Devlet’in engel olmaması
Vakıf arsaya müte‘allikadır Mahmiye-i İstanbul’da Şeyh Ferhad mahallesinde sâkin olup zikri âtî vakıf menzilin mütevellîsi olan Nikogos v. Sadet nâm Ermeni meclis-i şer‘de yine mahalle-i mezbûrda sâkin olup menzil-i mevkūf-ı câi’z-zikrin meşrûtun-lehâsından Meryem bt. Devlet nâm nasrâniyye tarafından husûs-ı âti’l-beyâna vekîl-i müsecceli olan Duma v. Asadur nâm Ermeni mahzarında üzerine bi’t-tevliyye da‘vâ edip mahalle-i mezbûrede vâki‘ bir tarafı Gena? mülküne ve bir tarafı Avadik v. Rüchan mülküne ve iki tarafı tarîk-i âm ile mahdûd iki bâb fevkānî ve bir bâb tahtânî odayı müştemil menzili bundan akdem hâlike olan Pagona bt. Asadur nâm nasrâniyye hâl-i sıhhatinde vakf-ı lâzım ile vakf, tasarrufunu evvelâ kendi nefsine, ba‘de helâkihâ fevkānî iki bâb odasını mu‘tekası Gena? ile gelini müvekkile-i mezbûreye ve tahtânî bir bâb oda yed-i mütevellî ile îcâr olunup hâsıl olan ücreti mahrûse-i Bursa’da nefy olunan Ermeni cemâ‘ati ve Ankara ve Tanrıvermiş cemâ‘atleri fukarâsının hâne-i avârızına verile deyû şart etmiş idi. Lâkin menzil-i mezbûr harîk-iâlî’de bi’l-külliye muhterik olup arsa-i sırf kaldıkda şart-ı vâkıf üzre bi’t-tevliyye arsa-i merkūme üzerine bir bâb tahtânî oda binâ etmek murâd eylediğimde müvekkile-i mezbûre Meryem mâni‘a olup vekîl-i mezbûrdan suâl olunup vakfiyetü’l-mevkūfe mûcebince ta‘arruzdan men‘ olunması murâdımdır deyû mazmûnu takrîr-i meşrûhunu nâtık vakfiye-i ma‘mûlün-bihâ ibrâz edip nazar ve vekîl-i mezbûr istintâk olundukda müvekkilesinin mazmûn-ı vakfiyeyi mu‘terife olduğunu bi’l-vekâle mu‘terif olmağın mûcebince ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene selâse ve seb‘în ve elf.
Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Mehmed b. Ramazan, Mustafa b. İsâ.
|