.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 182
Hüküm no: 134
Orijinal metin no: [11b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Piyâdezâde demekle meşhur Mehmed Efendi’nin menzil arsasını Nâzikizâde demekle meşhur Mustafa b. Mehmed’e vefâen sattığı

Bey‘ bi’l-vefâ Mahmiye-i İstanbul’da Molla Ahî mahallesinde sâkin mefharü kuzâti’l-İslâm Piyâdezâde demekle şehîr Mehmed Efendi meclis-i şer‘-i hatîr-i lâzımü’t-tevkīrde mefharü’l-müderrisîni’l-kirâm Nâzikîzâde demekle şehîr Mustafa Efendi b. Mehmed mahzarında ikrâr ve takrîr-i kelâm edip silk-i mülk-i sahîhimde münselik olup mahmiye-i mezbûrede Aksaray kurbunda Murad Paşa-yı Atîk mahallesinde vâki‘ bir tarafı Yusuf Çavuş b. Receb mülkü ve bir tarafı merhûm Ahmed Bey vakfı ve bir tarafı Ahmed Çavuş mülkü ve bir tarafı tarîk-i âm ile mahdûd muhterik menzil arsamı mûmâ-ileyh Mustafa Efendi’ye iki yüz elli esedî guruşa bey‘-i bi’l-vefâ tarîki ile bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr iki yüz elli esedî guruşu mûmâ-ileyh Mustafa Efendi yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Fahrü’l-müderrisîn Hüseyin Efendi b. Abdülbâkī, es-Seyyid Hüseyin Efendi, Mustafa Çelebi b. Osman, Müezzin Hasan Çelebi, Kâtib Mustafa Efendi.