.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 182
Hüküm no: 135
Orijinal metin no: [11b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yako v. İsak’ın Hasan Ağa b. Hüseyin’e olan borcun kefili Haydar v. Bereket’in ödemesi gerektiği

İsbât-ı kefâlet Mahmiye-i İstanbul’da Âşık Paşa mahallesi ahâlîsinden hâfızü’l-vesîka Hasan Ağa b. Hüseyin meclis-i şer‘de ( ) cemâ‘atinden Haydar v. Bereket nâm yahudi muvâcehesinde üzerine da‘vâ edip bin yetmiş üç Muharrem’inde gāib ani’l-meclis Yako v. İsak nâm yahudi benden dört yüz esedî guruş iktirâz ve kabz eyledikde mezbûr Haydar meblağı mezbûra emr ve kabûlü hâviye kefâletle kefîl oldukdan sonra asîl-i mezbûr Yako ile kefîl-i mezbûr Haydar minvâl-i muharrer üzre deyn-i vekâleti hâvî yedime temessük verdiklerinden sonra meblağ-ı mezbûrun yüz elli esedî guruşunu asîl-i mezbûr Yako yahudiden bi’d-defe‘ât alıp mâ‘adâsını almamakla, kefîl-i mezbûr Haydar yahudiden taleb ederim suâl olunsun dedikde gıbbe’s-suâl mezbûr yahudi cevâbında deyn-i mezbûra kefâleti inkâr eyledikde müdde‘î-i mezbûr Hasan Ağa’dan müdde‘âsı için beyyine taleb olundukda udûl-i müslimînden mahalle-i merkūme imâmı es-Seyyid Lütfullah Efendi b. es-Seyyid Emrullah ve müezzini Mustafa Çelebi b. Halil li ecli’ş-şehâde meclis-i şer‘de hâzırân olup ınde’l-istişhâd fi’l-vâki‘ mezbûr Yako meblağ-ı mezbûr dört yüz esedî guruşu târih-i mezkûrda müdde‘î-i merkūmdan iktirâz ve kabz eyledikde meblağ-ı mezbûr dört yüz esedî guruşa mezbûr Haydar huzûrumuzda emr ve kabûlü hâviye kefâletiyle kefîl olup biz bu husûsa vech-i muharrer üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın kefâleti cihetiyle meblağ-ı bâkī iki yüz elli esedî guruşa müdde‘î-i merkūm Hasan Ağa’ya edâya merkūm Haydar’a tenbîh olunup mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Sefer Efendi b. Mehmed, Ahmed Halîfe b. ( ), Çorbacı Mustafa Bey, Abdi Çelebi b. Hüseyin, Şükrullah b. Mustafa ve gayruhüm.