|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 183 Hüküm no: 136 Orijinal metin no: [11b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Nikola’nın babası Tanaş’a intikal eden Yorgaki v. Dimitri zimmetindeki alacağını tahsile Papa İstemad v. Tanaş’ın vekil olduğu
İsbât-ı verâset Husûs-ı âti’z-zikre vekâlet iddi‘â eden bâ‘isü’l-vesîka Papa İstemad v. Tanaş nâm zimmî meclis-i şer‘-i hatîrde Yorgaki v. Dimitri muvâcehesinde da‘vâ edip karındaşım Nikola nâm hâlik işbu merkūm Yorgaki zimmetinde karzdan beş yüz yetmiş akçe hakkı olup ba‘de’l-helâk meblağ-ı mezbûr hâlik-i merkūmun babası ve hasren vârisi olup cezîre-i Mora’da Benefşe’de sâkin Tanaş nâm zimmîye intikāl etmekle meblağ-ı mezbûru da‘vâ ve ahz ve îsâle beni tevkîl etmekle bi’l-vekâle meblağ-ı mezbûru [taleb ederim suâl olunsun dedikde], mezbûr Yorgaki cevâbında hâlik-i mezbûra vech-i muharrer üzre zimmetinde beş yüz yetmiş akçe deyni olduğunu ikrâr edip müvekkil-i mezbûr hâlik-i merkūmun babası ve hasren vârisi olduğunu ve vekâlet-i mezbûreyi münkir olıcak müdde‘î-i mezbûrdan da‘vâsına mutâbık beyyine taleb olundukda cezîre-i mezbûre sâkinlerinden Nikola v. Mihal ve Kiryaki v. İstani nâm zimmîler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müvekkil-i mezbûr Tanaş hâlik Nikola’nın babası ve hasren vârisidir. Meblağ-ı mezbûr bi hasebi’l-irsi’ş-şer‘î babası merkūm Tanaş’a intikāl etmekle merkūm Papa İstemad’ı meblağ-ı mezbûru merkūm Yorgaki’den da‘vâ ve ahz ve kendiye îsâle bizim huzûrumuzda tevkîl eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı mezbûru müvekkil için vekîl-i mezbûr def‘ ve teslîme medyûn-ı merkūma [12a] tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem sene 1073.
Şuhûdü’l-hâl: El-Hâc Ahmed b. Mahmud, Ali Beşe Çukadar, Mehmed b. Abdullah, Baba Resûl b. Rıdvan, Pireşkova v. Todoş, Yorgi v. İstani, İstani v. Dimitri.
|