.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 185
Hüküm no: 139
Orijinal metin no: [12a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Müneccim Sadi vakfı arsasının vakıf mütevellîsi Mustafa Çelebi tarafından Ali Çelebi b. İsâ’ya icâreteyn yoluyla kiraya verildiği

Temessük mûcebince istihkâm Mahmiye-i İstanbul’da Müneccim Sadi mahallesinde sâkin, işbu sâhibü’l-kitâb Ali Çelebi b. İsâ meclis-i şer‘de takrîr-i kelâm edip zikr olunan Müneccim Sadi evkāfından olup mahalle-i mezbûrede vâki‘ bir tarafı merhûm-ı mezbûr Müneccim Sadi ve iki tarafı vakf-ı mezbûr ve bir tarafı tarîk-i âm ile mahdûd arsa-i hâliyeyi vakf-ı mezbûr mütevellîsi Mustafa Çelebi târih-i kitâb senesi Şevvâlinin evâilinde otuz esedî guruş mu‘accele ve beher sene altmış akçe mukāta‘a ile bana îcâr ben dahi vech-i muharrer üzre istîcâr ve kabûl edip yedime hat ve hâtemini hâvî temessük vermişdir, mûcebince kıbel-i şer‘den istihkâmen hüccet verilmesi murâdımdır deyû mazmûnu takrîr-i meşrûhunu nâtık mezbûrun hat ve hâtemini hâvî temessük ibrâz etmeğin mûcebince savb-ı şer‘den li ecli’l-istihkâm işbu hurûf ketb olundu. Fi’l-yevmi’l-hâmis aşer min Şevvâli’l-mükerrem sene 1073.


Şuhûdü’l-hâl: Ali Efendi b. Mehmed el-İmâm, Mahmud Efendi b. Mustafa el-Müezzin, Mustafa Efendi b. Yusuf el-İmâm, Mustafa b. Yunus, Hasan b. Mustafa, Mustafa Beşe b. Abdullah, Ramazan Beşe b. Mehmed, Ali Beşe b. Mustafa, Cafer Çelebi b. Yusuf, Mustafa Efendi.