.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 185
Hüküm no: 140
Orijinal metin no: [12a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hâtun vakfı olan arsaya Veli Efendi b. İsmail’in mütevellî nasb edildiği

Hasbî mütevellî Mahmiye-i İstanbul’da Şehzâde câmi‘-i şerîfi kurbunda Molla Hüsrev mahallesinde vâki‘ merhûme Fâtıma Hâtun nâm sâhibetü’l-hayrın Şehzâde Sultan Mehmed Hân câmi‘-i şerîfi’nde imâm-ı evvel olanlara gallesini şart eylediği, bir tarafı Ömer Halîfe vakfı ve bir tarafı su kemeri ve bir tarafı tarîk-i hâs ve bir tarafı tarîk-i âm ile mahdûd muhterik menzil arsasının mütevellîsi olmayıp bir mütevellî nasbı lâzım ve mühim olmağın işbu râfi‘ü hâze’l-kitâb Veli Efendi b. İsmail vakf-ı mezbûra taraf-ı şer‘den hasbî mütevellî nasb olundukda ol dahi tevliyyet-i mezbûreyi kabûl ve hizmet-i lâzımesin edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem sene 1073.


Şuhûdü’l-hâl: Es-Seyyid Mehmed Efendi hatîb-i câmi‘-i mezbûr, Mehmed Efendi hatîb-i Sultan Selim, Mehmed Efendi b. Hüseyin, Musa Efendi b. Davud.