.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 186
Hüküm no: 141
Orijinal metin no: [12a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Abdülbâki Çelebi ile Ayşe Hâtun’un mütevellîsi oldukları arsayı Mehmed Çelebi b. Mustafa’ya icâreteyn yoluyla kiraya verdikleri

Temessük mûcebince istihkâm Mahmiye-i İstanbul’da Manisalı Çelebi mahallesinde sâkin işbu bâ‘isü’l-kitâb Mehmed Çelebi b. Mustafa meclis-i şer‘de takrîr-i kelâm edip merhûm Usûl Paşa [b.] Ayas Bey vakfından olup mahalle-i mezbûrede vâki‘ bir tarafı Gönderci el-Hâc Ali menziline ve bir tarafı vakf-ı mezbûra ve iki tarafı tarîk-i âm ile mahdûd büyût-ı adîdeyi müştemil evli odaları bin yetmiş Zilka‘desinde vâki‘ harîk-i kebîrde muhterik olup ma‘lûmü’l-hudûd arsa-i hâliyeyi meşrûtiyyet üzre vakf-ı mezbûrun mütevellîleri olan Abdülbâkī Çelebi ve Ayşe Hâtun arsa-i merkūme üzerine malım ile ihdâs eylediğim ebniye mülküm olmak üzre târih-i kitâb senesi Şevvâl-i mübârekinin gurresinden dört bin akçe icâre-i mu‘accele ve beher yevm dörder akçe icâre-i müeccele ile bana îcâr, ben dahi istîcâr ve kabûl edip yedime hat ve hâtemini hâvî temessük vermişlerdir ba‘de’n-nazar kıbel-i şer‘den istihkâmen hüccet verilmesi murâdımdır deyû mazmûnu takrîr-i meşrûhunu nâtık mezbûrların hat ve hâtemlerini hâvî temessük ibrâz etmeğin mûcebince savb-ı şer‘den li ecli’l-istihkâm işbu hurûf bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem sene 1073.


Şuhûdü’l-hâl: İsmail Efendi el-kadı, Hasan Efendi el-İmâm, Mustafa Çelebi b. Ramazan Efendi, el-Hâc Mehmed Beşe b. Mehmed, Hasan Beşe b. Sefer seroda-i yedinci sekbânân, Mehmed b. Davud es-Sarrâc, İsmail Efendi el-Müderris, Ali Beşe b. Hızır, Süleyman Beşe b. Abdullah.