.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 187
Hüküm no: 143
Orijinal metin no: [12a-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Karaki mahallesindeki müşterek arsalarına Osman Çavuş b. Ali’nin yaptığı duvar için Mustafa Efendi b. Hasan’ın hissesine düşeni ödeyeceği

Cidârda isbât-ı iştirâk Husûs-ı âti’l-beyânın mahallinde tahrîri iltimâs olunmağın kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi Hâssa mi‘mârlardan üstâd Ali b. Abdullah ile Mahmiye-i İstanbul’da Karaki mahallesinde vâki‘ merhûm Şâh Hûbân vakfından olup bir tarafı vakf-ı mezbûrdan el-Hâc Hüseyin tasarrufunda olan menzile ve bir tarafı yine vakf-ı mezbûrdan Osman Çavuş b. Ali tasarrufunda olan muhterik menzil arsasına ve iki tarafı tarîk-i âma müntehî menzil arsasının üzerine varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde zikr olunan arsanın icâre-i mu‘accele ve her şehr elli akçe ücret-i müeccele ile mutasarrıfı işbu bâ‘isü’l-kitâb Mustafa Efendi b. Hasan meclis-i ma‘kūd-ı mezbûrda, hâlâ vakf-ı mezbûr mütevellîsi Abdünnebî Ağa b. Resûl tarafından husûs-ı âti’l-beyâna sâbit vekîli olan Yusuf Çavuş b. Mehmed huzûrunda, yine vakf-ı mezbûrdan olup zikr olunan arsaya muttasıl icâre-i mu‘accele ve müeccele-i ma‘lûmeteyn ile muhterik menzil arsasının mutasarrıfı mezbûr Osman Çavuş muvâcehesinde üzerine da‘vâ ve takrîr-i kelâm edip kable’l-harîk mezbûr Osman Çavuş ile mâbeynimizde olan taş duvar ve üzerinde dolma duvar ma‘rifet-i mütevellî ile iştirâken tasarrufumuzda iken muhterik olmağla hâlâ mezbûr Osman Çavuş zikr olunan taş duvarı müceddeden kendi binâ edip benim hisseme düşen masrûfunu verir iken tasarrufuma mâni‘ olur, mezbûrdan suâl olunsun dedikde gıbbe’s-suâl mezbûr Osman Çavuş cevâbında kable’l-harîk işbu taş duvar ve üzerinde olan dolma duvar müstakillen benim tasarrufumda idi deyû iştirâken tasarruflarında olduğunu inkâr edicek müdde‘î-i mezbûrdan [12b] müdde‘âsını mübeyyine beyyine taleb olundukda udûl-i müslimînden olup mahalle-i mezbûre sükkânından Hasan Efendi b. Osman ve Ahmed Çelebi b. Abdurrahman ve Veli Bey b. Halil nâm kimesneler li ecli’ş-şehâde meclis-i ma‘kūd-ı mezbûrda hâzırûn olup istişhâd olunduklarında, fi’l-hakīka müdde‘î-i mezbûr Mustafa Efendi’nin kable’l-harîk mezbûr Osman Çavuş ile mâbeynlerinde olan taş duvar ve üzerinde olan dolma duvar ma‘rifet-i mütevellî ile iştirâken tasarruflarında iken muhterik oldu hâlâ iştirâken tasarruflarındadır, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince sâlifü’z-zikr duvarı müdde‘î-i mezbûr ile üslûb-ı sâbık üzre iştirâken tasarrufa mezbûr Osman Çavuş’a ba‘de’t-tenbîh mezbûr Mustafa Efendi i‘âde-i kelâm edip işbu mi‘mâr-ı mezbûr mesâha ve takvîm eylediği tûlen on zirâ‘ ve kadden beş zirâ‘ bi hesâb-ı şatrancî elli zirâ‘ zikr olunan taş duvarın her zirâ‘ı kırkar akçeden iki bin akçe olup meblağ-ı mezbûrdan benim hisseme âid ola[n] bin akçeyi mezbûr Osman Çavuş’a teslîme ta‘ahhüd eyledim dedikde gıbbe’t-tasdîk vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Hasan b. Bayram ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Abdurrahman Çelebi b. Hasan Efendi, Mehmed Çelebi b. eş-Şeyh Aydın Efendi, el-Hâc Hüseyin b. Abdullah, Mehmed Çelebi b. Ahmed, Mehmed Dede.