|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 188 Hüküm no: 144 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Bayram b. İlyas’ın kölesi İvaz b. Abdullah’ı azat ettiği
İsbât-ı ıtk Mahmiye-i İstanbul’da Manisalı Çelebi mahallesi ahâlîsinden olup mukaddemâ fevt olan Bayram b. İlyas’ın verâseti zevce-i metrûkesi Güllü bt. Abdullah nâm hâtun ile li ebeveyn kız karındaşı Kamer Hâtun’a münhasıra oldukdan sonra, mezbûre Güllü asâleten ve mezbûre Kamer Hâtun tarafından husûs-ı âtîye vekîl olup nehc-i şer‘î-i mu‘teber üzre vekâleti sâbite olan sadrî oğlu Derviş b. Mehmed vekâleten meclis-i şer‘de İvaz b. Abdullah nâm sagīrin mütebennîsi ve kıbel-i şer‘den mansûb vasîsi olan Ahmed Çelebi b. Mahmud mahzarında üzerine da‘vâ ve takrîr-i kelâm edip sagīr-i mezbûr müteveffâ-yı mezbûrun abd-i memlûkü olup irsen bize intikāl etmişdir. Suâl olunup sagīr-i mezbûru mezbûr Ahmed Çelebi bize teslîme tenbîh olunmak matlûbumuzdur dediklerinde, gıbbe’s-suâl vasiyy-i mansûb Ahmed Çelebi cevâbında fi’l-vâki‘ sagīr-i mezbûr müteveffâ-yı mezbûrun mukaddemâ abd-i memlûkü olup lâkin müteveffâ-yı merkūm sıhhatinde huzûr-ı müslimînde sagīr-i mezbûr için oğlumdur demekle âzâd olup hür olmuşdur deyû def‘le mukābele eyledikde gıbbe’l-istintâk ve’l-inkâr ve akībe’l-istişhâd udûl-i ricâl-i müslimînden İbrahim Beşe b. Abdullah ve Mustafa Beşe b. Abdullah ve İsmail Beşe b. Mustafa ve Ahmed Çelebi b. Mahmud ve Ali b. Abdullah ve Sâlih b. Ali nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ müteveffâ-yı mezbûr Bayram hâl-i sıhhatinde abd-i memlûkü olan gulâm-ı mezbûr için huzûrumuzda oğlumdur deyip bizi işhâd eyledi elân sagīr-i mezbûr sâir ahrâr gibi hürdür. Biz bu husûsa bu vech üzre şâhidleriz şehâdet dahi ederiz deyû herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın gulâm-ı mezbûrun ıtkına ba‘de’l-hükm mezbûre Güllü ve vekîl-i merkūm Derviş Çelebi mu‘ârazadan men‘ olundukdan sonra sagīr-i mezbûr vasiyy-i merkūm Ahmed Çelebi yedinde ibkā olunup mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene selâse ve seb‘în ve elf.
Şuhûdü’l-hâl: Abdi Çelebi b. Hüseyin, Şükrullah Bey b. Mustafa, Mehmed b. Abdülmennân, Resûl b. Rıdvan, Mehmed b. Ramazan, Ahmed Çelebi kethüdâ-yı muhzırân, Hüseyin b. Abdülcebbar, Muharrem Çelebi b. ( ).
|