|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 209 Hüküm no: 180 Orijinal metin no: [15a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Ağa b. Sinan’ın Ramazan Bey b. Maksud’a olan borcu için karısı Afife Hâtun’un iki menzilini rehin vererek kefil olduğu
Rehin ve kefâlet bi’l-mâl Mahmiye-i İstanbul’da Kâtib Muslihiddin mahallesi sâkinlerinden Mehmed Ağa b. Sinan meclis-i şer‘-i hatîrde Ramazan Bey b. Maksud mahzarında ikrâr ve i‘tirâf edip merkūm Ramazan Bey’e zimmetimde lâzımü’l-edâ yüz kırk yedi bin akçe deynim olup mukābelesinde zevcem işbu hâzıre bi’l-meclis Afife Hâtun’un mahalle-i mezbûrede vâki‘ bir tarafı Mısırlızâde Mehmed Çelebi mülkü ve bir tarafı el-Hâc Mehmed vakfı ve bir tarafı yine zevceme meşrûta vakıf menzil ve bir tarafı tarîk-i âm ile mahdûd mülk menzili ile hazret-i Ebâ Eyyûb Ensârî’de Emir Buhârî’de vâki‘ lede’l-ahâlî ma‘lûmü’l-hudûd mülk menzili izniyle mezbûr Ramazan Bey’e rehin vaz‘ ve teslîm edip ol dahi irtihân ve kabz eyledi dedikde gıbbe’t-tasdîki’ş-şer‘î mezbûre Afife Hâtun meblağ-ı mezbûr yüz kırk yedi bin akçenin mecmû‘una kefâlet-i sahîha-i şer‘iyye ile kefîl oldum ve zikr olunan menzil meblağ-ı mezbûr mukābelesinde benim iznim ile merhûndur deyip mezbûre Afife’nin kebîr oğlu Mehmed Çelebi b. Şeyhî dahi meblağ-ı mezbûrun cümlesine kezâlik kefâlet-i sahîha ile kefîl olmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Ali Ağa kethüdâ yeri hâlâ, İbrahim Ağa kethüdâ yeri hâlâ silahdârân, Ali Ağa selâm çavuşu hâlâ, Oruc Çavuş b. Mustafa, Mehmed Çavuş b. Sefer, Ali Çavuş b. Mehmed, Osman Çavuş el-Mübâşir, Ebûbekir Çavuş sipâhiyân, İbrahim Çavuş b. İbrahim, Mahmud Efendi b. Abdülkādir, el-Hâc Ahmed b. Ramazan.
|