.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 210
Hüküm no: 182
Orijinal metin no: [15b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Ramazan’ın hizmetkârları olan Bayram ve Mustafa’nın terekelerini kabz etmediği

Yemîn Havâss-ı Aliyye kazâsına tâbi‘ nâhiye-i Silivri ve mülhakātında emîn-i beytülmâl olan Sinan Ağa b. Mehmed meclis-i şer‘-i hatîrde Mustafa b. Ramazan muvâcehesinde bi’l-emâne da‘vâ edip mezbûr Mustafa b. Ramazan’ın nâhiye-i mezbûreye tâbi‘ Harâccı nâm karyede vâki‘ çiftliğinde hizmetkârlarından Mustafa nâm kimesne bilâ-vâris fevt olup ve Bayram nâm kimesne dahi fevt olup zevcesi Gülistan bt. Abdullah nâm hâtunu terk eyleyip mezbûr Mustafa’nın cemî‘ terekesi ve mezbûr Bayram’ın terekesinin selâse-i erbâ‘ı cânib-i beytülmâle âid olmuş iken, merkūm Mustafa müteveffâ-yı mezbûr Bayram’ın terekesinden dört bin ve Mustafa’nın terekesinden üç bin akçe kabz etmişdir. Mezbûr Bayram’ın terekesinin selâse-i erbâ‘ını ve merkūm Mustafa’nın mecmû‘-ı terekesini bi’l-emâne merkūm Mustafa’dan da‘vâ ederim deyicek gıbbe’l-istintâk ve’l-inkâr müdde‘î-i mezbûrdan beyyine taleb olundukda izhâr-ı acz edip istihlâf etmeğin mezbûr Mustafa’ya hizmetkârları müteveffiyân-ı mezbûrânın vech-i muharrer üzre terekesin kabz etmediğine yemîn teklîf olundukda ol dahi hasebi’l-mes’ûl half billâhi te‘âlâ etmeğin bilâ-beyyine emîn-i mezbûr da‘vâdan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem sene 1073.


Şuhûdü’l-hâl: Es-Sâbikūn.