|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 210 Hüküm no: 183 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rodos’da vefat eden Yahya Efendi’nin vârislerinin Mehmed Çelebi b. Musa’ya verilen emanetten alacakları kalmadığı
Kabz-ı emânet Husûs-ı âti’l-beyânı mahallinde tahrîr için kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Harâccı Muhyiddin mahallesinde mefharü kuzâti’l-İslâm Mehmed Mukīm Efendi’nin sâkin olduğu menzile varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde mezbûr Mehmed Mukīm Efendi’nin karındaşı olup cezîre-i Rodos’da vefât eden merhûm Yahya Efendi’nin sulbî sagīr oğulları Ahmed Çelebi ve Sâlih Çelebi ve sulbiye sagīre kızları Nesli ve Emetullah’ın tesviye-i umûrlarına kıbel-i şer‘den mansûbe vasîleri ve vâlideleri Emine bt. Mustafa tarafından husûs-ı âti’z-zikre vekîl-i müseccel olan vasiyy-i mezbûrenin karındaşı fahrü’l-müderrisîni’l-kirâm Ahmed Efendi b. Mustafa Ağa meclis-i ma‘kūd-ı mezbûrda, Balkapanı’nda tüccâr tâifesinden Öküz Mehmed Çelebi mahallesinde işbu bâ‘isü’l-kitâb Mehmed Çelebi b. Musa mahzarında bi’l-vekâle ikrâr ve takrîr-i kelâm edip müteveffâ-yı merkūmun mahmiye-i mezbûrede olan terekesinden merkūm Mehmed Çelebi yedine emânet vaz‘ olunan bir mühürlü sepet içinde mevcûd altı yüz altmış aded şerîfî altın ve iki yüz doksan bir riyâlî guruş taraf-ı mîrîden taleb olundukda ben zikr olunan meblağ-ı mezbûrdan iki yüz altmış altın ile iki yüz doksan bir riyâlî guruşu alıp cânib-i mîrîye teslîm eyleyip bâkī kalan dört yüz altını dahi vekâletim hasebiyle merkūm Mehmed Çelebi yedinden tamâmen ahz u kabz eyledim ba‘de’l-yevm merkūm Mehmed Çelebi yedinden kat‘â emânet vaz‘ olunan meblağdan bir akçe ve bir habbe bâkī kalmadı dedikde gıbbe’t-tasdîki’ş-şer‘î vâki‘ hâli Mevlânâ-yı merkūm mahallinde tahrîr ve ba‘dehû ma‘an irsâl olunan Mehmed b. Ramazan ile meclis-i şer‘-i hatîre gelip ikrâr ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene selâse ve seb‘în ve elf.
Şuhûdü’l-hâl: Mefharü kuzâti’l-İslâm Mehmed Mukīm Efendi b. Ahmed el-Kadı be Siroz sâbıkan, Mefharü’l-a‘yân Abdülbâkī Efendi kâtib-i fodla sâbıkan, Abdülvehhab Efendi b. Ziyaeddin el-kadı, Ahmed Efendi b. Ali el-kadı, es-Seyyid Mehmed Efendi b. es-Seyyid İbrahim Efendi el-kadı, Abdülbâkī Efendi b. Musa Efendi el-kadı, el-Hâc Hızır b. Ali, Ali Beşe b. Ali, sarrâc Halil Çelebi b. Hüseyin.
|