|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 213 Hüküm no: 186 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa Çelebi b. İsmail ile Mehcibin bt. Abdülvehhab’ın birbirinin zimmetini ibrâ ettikleri
İbrâ Medîne-i Ebâ Eyyûb el-Ensârî -radiye anhü’l-Bârî- mahallâtından Câmi‘-i Kebîr mahallesi sükkânından Mustafa Çelebi b. İsmail meclis-i şer‘-i hatîr-i lâzımü’t-tevkīrde atîkası râfi‘atü’l-kitâb Mehcibin bt. Abdülvehhab muvâcehesinde ikrâr ve i‘tirâf edip ba‘de’l-i‘tâk mezbûre Mehcibin ile beynimizde ba‘zı bey‘ u şirâ ve ahz u i‘tâ ve mu‘âmelât-ı şettâ vâkı‘a olmuş idi hâlâ târih-i kitâba gelince beynimizde cârî olan mu‘âmelât ve sâir hukūk-ı ma‘lûmeye müte‘allika âmme-i de‘âvî ve mütâlebât ve eymân ve muhâsamâtdan her birimiz âharın zimmetini ibrâ-i âm-ı kātı‘ü’n-nizâ‘ ile ibrâ eyledik dedikde mezbûr Mustafa Çelebi’nin ikrâr-ı meşrûhunu mezbûre Mehcibin vicâhen tasdîk ve ibrâ-i mezbûru tahkīk etmeğin mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn [min şehri Şevvâli’l-mükerrem li sene selâse ve seb‘în ve elf].
Şuhûdü’l-hâl: Zahrü’l-a‘yân Hüseyin Ağa b. Ahmed, İbrahim b. Mustafa, İbrahim b. Musa, Mustafa b. Hüseyin, Ali Beşe Çukadar, Mehmed b. Mustafa, İslâm b. Mustafa.
|