|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 217 Hüküm no: 193 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hüseyin b. Mustafa’nın Hoca Muhyiddin vakfından kiraladığı ve yandıktan sonra tekrar inşâ ettiği odaların kirasının tenzil edildiği
Tenzîl-i ücret Mahmiye-i İstanbul’da Hatîb Muhyiddin mahallesi sâkinlerinden Hüseyin b. Mustafa nâm kimesne meclis-i şer‘-i hatîrde takrîr-i kelâm edip Hoca Muhyiddin vakfından olup mahalle-i mezbûrede vâki‘ iki tarafdan vakf-ı mezbûr ve bir tarafdan Yusuf Bey tasarrufunda olan vakıf menzil ve bir tarafdan tarîk-i hâs ile mahdûd tûlen sekiz zirâ‘ ve arzen altı zirâ‘ bi hesâb-ı terbî‘î kırk sekiz zirâ‘ arsa üzerinde mebnî bir bâb fevkānî ve bir bâb tahtânî odalar, icâre-i mu‘accele ve beher şehr elli beşer akçe ücret-i müeccele ile tasarrufumda iken harîk-i kebîrde muhterik olup kendi malımdan arsa-i mezbûre üzerinde bir bâb fevkānî ve bir bâb tahtânî odalar binâ eylediğimden sonra ecr-i misli olan ayda otuz akçeyi cânib-i [vakfa] verir iken mütevellîsi ayda benden elli beşer akçe taleb eder, hâlâ savb-ı şer‘den üzerine varılıp tahmîn-i sahîh ile ecr-i misli tahmîn olunmak matlûbumdur dedikde cânib-i şer‘den Mevlânâ Sofu Mehmed Efendi irsâl olunup ol dahi hâssa mi‘mârlardan üstâd Ali b. Abdullah ile zeyl-i rakīmde isimleri mezkûr husûs-ı mezbûra kemâl-i şu‘ûrlârı olan müslimîn ile mahall-i mezbûra varıp zikr olunan odaların ayda ecr-i misli ancak otuz akçe olduğunu mütevellîsi Mehmed Çelebi b. Hasan muvâcehesinde haber verdiklerinde, hakīkat-i hâli Mevlânâ-yı mezbûr mahallinde tahrîr, ba‘dehû ma‘an irsâl olunan Yusuf Çavuş ile meclis-i şer‘a gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem sene 1073.
Şuhûdü’l-hâl: Mustafa Çelebi b. Fethullah el-Müezzin, Mehmed Çelebi b. Yusuf, el-Hâc Mustafa b. Müstecâb, Hüseyin b. Mustafa, Mustafa b. Mehmed, Hüseyin b. Ali, Mehmed b. Receb, Şaban b. Mustafa.
|