|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 218 Hüküm no: 194 Orijinal metin no: [16b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Râbia bt. Ahmed’in varislerinin Rus asıllı cariye Timurhan bt. Abdullah’ı azat ettikleri
Itâknâme Mahmiye-i Galata müzâfâtından Kasaba-i Kasımpaşa mahallâtından el-Hâc Ahmed mahallesinde sâkine iken bundan akdem vefât eden Râbia bt. Ahmed nâm hâtunun verâseti zevc-i metrûkü el-Hâc Muharrem b. Ali’ye ve zevi’l-erhâm cihetinden Mustafa Çelebi b. Yahya’ya münhasıra olduğu şer‘an zâhir ve müte‘ayyin oldukdan sonra, merkūmân el-Hâc Muharrem ve Mustafa Çelebi meclis-i şer‘-i hatîr-i lâzımü’t-tevkīrde her biri ikrâr ve takrîr-i kelâm edip mûrisimiz müteveffâ-yı merkūme Râbia hâl-i hayâtında kendiye rıkkıyyetini mu‘terife olan uzun boylu, gök elâ gözlü, açık kaşlı Rusiyyetü’l-asl Timurhan bt. Abdullah nâm câriye-i memlûkesini kendiye dört sene hizmet etmek üzre kitâbete kesip iki sene hizmet ettikden sonra mezbûre Râbia fevt olup bize intikāl ettikde, biz dahi mezbûre Timurhan’ı i‘tâk ve tahrîr eyledik ba‘de’l-yevm mezbûre Timurhan sâir harâir-i asliyyât gibi hürre olup üzerinde velâyet-i şer‘iyyeden gayrı hakkımız bâkī kalmadı dediklerinde, mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min] Şevvâli’l-mükerrem li sene selâse ve seb‘în ve elf.
Şuhûdü’l-hâl: Hasan Efendi b. Şaban el-İmâm, Mahmud Efendi b. Mehmed, es-Seyyid Ali Çelebi b. es-Seyyid Mehmed, Hasan Çelebi b. Ahmed el-Müezzin, Halil Ağa b. İdris, el-Hâc Ali b. Ali, İbrahim Beşe b. Ali, Sefer Bey b. Hasan bevvâb-ı sultânî.
|