.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 221
Hüküm no: 199
Orijinal metin no: [17a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihan bt. Davud Çavuş’un Şahbaz b. Abdullah’dan muhâlaa yoluyla boşandığı

Hul‘ Husûs-ı âti’l-beyânın mahallinde tahrîri için savb-ı şer‘den bi’l-iltimâs irsâl olunan Abdülkādir Efendi mahmiye-i İstanbul’da Tercüman Yunus mahallesinde vâki‘ Şahbaz bt. Abdullah’ın menziline varıp zeyl-i rakīmde muharrerü’l-esâmî müslimîn huzûrunda akd-i meclis-i şer‘-i mübîn eyledikde mezbûr Şahbaz’ın zevcesi İsmihan bt. Davud Çavuş zâtı Pîrî Bey b. Veli nâm bevvâb-ı sultânî ve mataracı Ali Beşe b. Oruc ta‘rîfleri ile mu‘arrefe oldukdan sonra meclis-i ma‘kūd-ı mezbûrda, zevc-i muhâlı‘ı mezbûr Şahbaz mahzarında ikrâr-ı tâm ve takrîr-i kelâm edip zevcim mezbûr ile zimmetinde mütekarrir ve ma‘kūdun-aleyh olan on dört bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre ve mezbûr Şahbaz’ın firâşından hâsıl olan hamlim zuhûr ederse yedi sene tamâmına dek kendi malımdan infâk ve iksâ etmek üzre muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika de‘âvî ve mütâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î Mevlânâ-yı mezbûr hakīkat-i hâli mahallinde tahrîr, ba‘dehû ma‘an irsâl olunan Mustafa Çelebi b. Rıdvan ile meclis-i şer‘a gelip vukū‘u üzre ihbâr ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem sene 1073.


Şuhûdü’l-hâl: Mefharü’l-müderrisîni’l-kirâm Mustafa Efendi necli’l-merhûm Mustafa Çavuş, Hasan Efendi b. Hüseyin, Mehmed Efendi b. Süleyman el-İmâm, Mustafa Ağa b. Mahmud, Hasan Efendi b. Receb, İbrahim Efendi imâm-ı Fethiye, Mustafa Ağa b. Mehmed, Yusuf Ağa b. Mehmed, Hüseyin Çelebi b. Hasan, Ali Çelebi b. Ahmed, Süleyman Çelebi b. Hasan.