.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 222
Hüküm no: 200
Orijinal metin no: [17a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kosta v. Rizo’ya intikal eden terekeyle ilgili dava için Kosta tarafından Yani v. Pavli’nin vekil tayin edildiği

Vekâlet Vilâyet-i Rumeli’nde Yenişehir kazâsına tâbi‘ Kûhistan nâhiyesi kurâsından Kostanya nâm karye ahâlîsinden Kosta v. Rizo nâm zimmî tarafından ikrâr-ı âti’z-zikre vekîl olup mumcu Kostantin v. Andon ve bakkal İstaryano v. Yorgi nâm zimmîler şehâdetleriyle vekâleti sâbite olan mumcu Dimo v. Hıristo nâm zimmî meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilim mezbûr Kosta’nın li ebeveyn karındaşı olup atasının li ebeveyn kız karındaşı Kalo bt. Yani nâm nasrâniyyenin hâlike olmağla terekesine vâzı‘u’l-yed olan Todori nâm zimmîden kendiye intikāl eden nısf hissesini mezbûr Todori’den da‘vâ ve taleb ve kabz ve kendiye îsâl ve teslîme ve kabz ve teslîm mütevakkıf olduğu umûra râfi‘ü’l-kitâb işbu Yani v. Pavli nâm zimmîyi vekâlet-i mevkūfe ile tarafından vekîl ve nâib-i menâb nasb ve ta‘yîn eyledi dedikde ol dahi vekâlet-i mezkûreyi kabûl ve hizmet-i lâzımesini edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem sene 1073.


Şuhûdü’l-hâl: Abdi Çelebi b. Hüseyin, Şükrullah Bey b. Mustafa, mumcular kethüdâsı Ömer, Yani v. Yorgi, Todori v. Mihal, Andon v. Dimo, Yiğidbaşı Dimo.