|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 224 Hüküm no: 203 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Ağa b. Mehmed’in menzil, çiftlik ve mülkünü Bağdad Ağası Ahmed Ağa’ya sattığı, tarlalarının tasarrufunu da ferâğ ve tefvîz ettiği
Sâbıkan Bağdad Ağası olan Ahmed Ağa’nın çiftlik hüccetidir Husûs-ı âti’z-zikrin mahallinde tahrîri iltimâs olunmağın kıbel-i şer‘-i kavîmden Mevlânâ Mehmed Efendi irsâl olunup ol dahi mahmiye-i İstanbul’da Sofular mahallesinde sâbıkan Bağdad Ağası olan umdetü’l-emâcid ve’l-a‘yân Ahmed Ağa’nın sâkin olduğu menzile varıp zeyl-i kitâbda mastûrü’l-esâmî olan müslimîn huzûrunda akd-i meclis-i şer‘-i şerîf eyledikde yine mahmiye-i mezbûre mahallâtından Mercan Ağa mahallesinde sâkin Ahmed Ağa b. Mehmed meclis-i mezbûrda, işbu râfi‘ü’l-kitâb mûmâ-ileyh Ahmed Ağa muvâcehesinde bi’t-tav‘ ve’r-rızâ ikrâr ve i‘tirâf edip Havâss-ı Refî‘a müzâfâtından Çekmece-i Kebîr nâhiyesine tâbi‘ Firûz nâm karyede vâki‘ bir tarafdan mer‘â ve bir tarafdan harman yeri ve iki tarafdan tarîk-i âm ile mahdûd beş bâb tahtânî odaları ve bir ahır ve samanlığı ve hazîne yeri ve havlu ve mâ-i cârî ve eşcâr-ı müsmire ve gayr-ı müsmire hadîkayı müştemil olan menzil ile yine karye-i mezbûrede vâki‘ iki tarafı Ali Ağa mülkü ve bir tarafı sâhil-i bahr ve bir taraf tarîk-i âm ile mahdûd bir bâb fevkānî iki bâb tahtânî odaları ve akarsuyu ve havuz ve zât-ı eşcâr-ı müsmire ve gayr-ı müsmire bahçeyi ve bağı müştemil olup çiftlik ta‘bîr olunur mülk menzilimi ve menzil-i ol merkūm içinde mevcûd bir çift camus ile dört çift kara sığır öküzlerimi ve Kenan nâm abd-i memlûküm ile Mülâyim nâm câriyemi ve dört kara sığır ineği ile beş danayı ve iki güğüm ve dört tencere ve üç sahan ve iki bakraç ve dört araba ve dört kovan ve âlât-ı zirâ‘at ve esbâb-ı hırâseti ve sâir çiftliğe lâzım olup beynimizde ma‘lûm olan eşyâmı ve menzil-i mezbûr kurbunda lede’l-cîrân ma‘lûmü’l-hudûd bir dönüm mülk bahçemi ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-cevânib bir kıt‘a mülk bostanını ve yine karye-i mezbûrede vâki‘ iki tarafdan çiftlik-i mezbûr tarlası ve [bir] taraf-ı sâhil-i bahr ve iki taraf tarîk-i âm ile mahdûd olup tahmînen yirmi araba alef hâsıl olur bir kıt‘a mülk çayırımı dahi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müşârün-ileyh Ahmed Ağa’ya bi safkatin vâhidetin bey‘-i bâtt-ı sahîh-i şer‘î ile yüz doksan beş bin nakd-i râyic fi’l-vakt akçeye bey‘ ve teslîm ol dahi emlâk-ı merkūmeyi vech-i mübeyyeni üzre iştirâ ve tesellüm ve kabz ve kabûl eyledikden sonra, ol çiftliğe intimâ ile tahdîd ve tavsîfden müstağnî olup karye-i mezbûre hudûdu dâhilinde mevâzi‘-i müteferrikada vâki‘ tahmînen yüz keyl tohum istî‘âb eder, ma‘lûmetü’l-mikdâr olan tarlalarımın hakk-ı tasarruflarını dahi merkūm Sultan Bayezid Hân hazretleri evkāfı arâzisinden olmağla mütevellî-i vakf-ı mezbûr ma‘rifetiyle müşârün-ileyh Ahmed Ağa’ya otuz beş bin akçe bedel mukābelesinde ferâğ ve tefvîz, ol dahi vech-i muharrer üzre tefevvüz ve kabûl eyledikden sonra, semen-i mezbûr yüz doksan beş bin akçe ile bedel-i merkūm otuz beş bin akçe ki cem‘an iki yüz otuz bin akçeyi müşârün-ileyh Ahmed Ağa yedinden bi’t-tamâm ahz ve kabz eyledim ba‘de’l-yevm çiftlik-i mezbûr mûmâ-ileyh Ahmed Ağa’nın mülk-i müşterâsıdır, keyfe mâ yeşâ’ mutasarrıf ola ve ol tarlalar dahi havza-i tasarrufu olmuşdur emsâli tasarruf gibi mutasarrıf olsun, vechen mine’l-vücûhi’ş-şer‘iyye ve sebebin mine’l-esbâbi’l-mer‘iyye benim alâka ve medhalim kalmadı dedikde gıbbe’t-tasdîk vâki‘ hâli Mevlânâ-yı mezbûr mahallinde tahrîr, ba‘dehû ma‘an ba‘s olunan Yusuf Çavuş b. Abdullah ve Şaban b. Mehmed ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb şüd. Fi’l-yevmi’l-hâmis ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Umdetü’l-a‘yân Anber Ali Ağa, Fahrü’l-a‘yân Hasan Ağa, es-Seyyid Mehmed Efendi [b.] es-Seyyid Ahmed, imâm-ı Mercan Ağa, Süleyman Ağa b. Ali, Mehmed Bey kethüdâ-yı bevvâbân-ı Saray-ı atîk, Ali Çelebi b. Mehmed bevvâb-ı sultânî, Ahmed Ağa b. Hüseyin, Mehmed Efendi b. Osman el-Müderris, Süleyman Bey b. Hüseyin bostânî, Murad Beşe b. Hasan, Hüseyin Çelebi b. Musa.
|