.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 225
Hüküm no: 204
Orijinal metin no: [17b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Katona bt. Avraham’ın Kumkapı meyhanecilerine olan borcunu ödediği

İbrâ Mahmiye-i İstanbul’da Kumkapı meyhânecilerinden Panayot v. Minho ve Nikola v. Yorgi ve Kanilo v. Tırandafilo nâm zimmîler meclis-i şer‘-i hatîr-i lâzımü’t-tevkīrde râfi‘atü’l-vesîka Katona bt. Avraham muvâcehesinde her biri ikrâr ve i‘tirâf edip müşterek malımızdan mezbûre Katona zimmetinde iki yüz seksen beş riyâlî guruş hakkımız olup mukābelesinde yedimize bir sorguç rehin vaz‘ ve teslîm etmiş idi hâlâ meblağ-ı mezbûr iki yüz seksen beş guruşu tamâmen alıp kabz eyledik ve rehin-i mezbûru mezbûre Katona’ya def‘ ve teslîm eyledik, ol dahi tesellüm eyledi ba‘de’l-yevm mezbûre Katona zimmetinde bir akçe ve bir habbe hak ve alâkamız kalmadı. Ve mukaddemâ mezbûre Katonaoğlu işbu hâzır bi’l-meclis David ve İsak ve Krali nâm yahudiler ile beynimizde ahz ve i‘tâ ve mu‘âmelât-ı şettâ vâkı‘a olmuş idi hâlâ zikr olunan mu‘âmelâta müte‘allika âmme-i da‘vâdan ve târih-i kitâba gelince beynimizde câriye hukūk-ı ma‘lûme ve mechûle da‘vâsından mezbûre Katona’nın zimmetini ibrâ-i âm-ı kātı‘ü’n-nizâ‘ ile ibrâ ve iskāt eyledik dediklerinde, mezbûrların ikrâr-ı meşrûhların mezbûre Katona ve oğulları vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâlis min Şevvâli’l-mükerrem li sene selâse ve seb‘în ve elf. Min hicreti men lehü’l-izz ve’ş-şeref.


Şuhûdü’l-hâl: Mustafa Çavuş tercümânî, Osman Çavuş b. Hasan, Şaban Çavuş b. Receb, el-Hâc Ahmed b. Mahmud, Ahmed Çelebi ed-Dâ‘î, Abdi Çelebi b. Hüseyin.