|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 226 Hüküm no: 205 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Altıpoğaça mahallesinden Halil’in Firûzlu köyündeki iki bahçesini Osman b. Ali’ye sattığı, tarlalarının tasarruf hakkını da ferâğ ve tefvîz ettiği
Mübâye‘a-i bahçe Fi’l-asl vilâyet-i Anadolu’da Keşab kazâsı müzâfâtından Fîrûzlu nâm karye ahâlîsinden olup hâlâ mahmiye-i İstanbul’da Kadıçeşmesi kurbunda Altıpoğaça mahallesinde sâkine Halil b. ( ) nâm kimesne meclis-i şer‘de hâfızü’l-vesîka Osman b. Ali mahzarında tav‘an ikrâr edip karye-i merkūme toprağında Tomruk Çukuru nâm mahalde vâki‘ bir cânibi Kula deresi ve bir cânibi Kulalı mülkü ve bir cânibi Oruclu mülkü ve bir cânibi dere ile mahdûd eşcâr-ı müsmire ve gayr-ı müsmireyi müştemil mülk bahçemi ve Elmasekisi nâm mahalde vâki‘ bir tarafı Osman müezzin mülküne ve bir tarafı ba‘zan Süleyman ve ba‘zan Ebûbekir Halîfe mülküne ve bir tarafı Himmet sınırına ve bir tarafı tarîk-i âma müntehî zât-ı eşcâr-ı müsmire ve gayr-ı müsmire bahçeyi ve Çorak nâm mahalde vâki‘ beyne’l-ahâlî ma‘lûmü’l-hudûd bir dönüm mikdârı mülk yerimi safka-i vâhide ile yirmi riyâlî guruşa mezbûr Osman’a bey‘ ol dahi minvâl-i muharrer üzre iştirâken kabûl ve aşağı yolda Kurtini nâm mahalde ve Köydeni? nâm mahalde lede’l-ahâlî ma‘lûmü’l-hudûd bir dönüm mikdârı on dört kıt‘a tarlamı sâhib-i arz izni ile on beş riyâlî guruş bedel mukābelesinde mezbûr Osman’a ferâğ ve tefvîz, ol dahi tefevvüz ve kabûl eyledikden sonra semen-i mezbûr yirmi bir riyâlî guruş ile bedeli ferâğ olan on beş riyâlî guruş mezbûr Osman yedinden alıp kabz edip bahçeler ve yerlerim cümlesini mahallinde tesellüm ve zabta mezbûr Osman’ı taslît eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem sene 1073.
Şuhûdü’l-hâl: Ali b. Hüseyin, Ömer Efendi b. Ali, Mahmud Halîfe b. İbrahim, Mehmed Halîfe b. Mustafa, Osman Kethüdâ b. Halil, Veli b. Ali, Musa b. Mustafa ve gayruhüm.
|