.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 226
Hüküm no: 206
Orijinal metin no: [18a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Drako ve Kostantin’in menziline bitişik seddin yeniden inşâsı

Binâya izin Hâlâ Boğdan beyi kethüdâsı olan râfi‘i’r-rakīm Drako ve karındaşı ve karındaşı oğlu Kostantin meclis-i şer‘de her biri takrîr-i kelâm edip mahmiye-i İstanbul’da Fener kapısı dâhilinde Abdi Subaşı mahallesinde hâlâ sâkin olduğumuz menzile muttasıl kâfirî seddin kaddi baştan başa çatlayıp, bizim menzilimiz üzerine ziyâde meyl etmekle menzilimizin dahi ba‘zı mevâzi‘i ayrılıp mutazarrır olmuşuzdur. Ol sed münhedim olursa biz ve ol seddin önünde vâki‘ menâzil erbâbı küllî mutazarrır olduklarından mâ‘adâ telef-i nefs mukarrerdir. Biz bu husûsu mukaddemâ ve hâlen Der-i Devlet’e i‘lâm ettiğimizde, cânib-i şer‘den nâib ve mi‘mâr varıp keşf oluna deyû yedimizde iki kıt‘a buyruldu-i şerîf ihsân olunmuşdur. Cânib-i şer‘-i mergūbdan ol seddin üzerine varılıp münhedim olmaya karîb olan mevâzi‘i keşf ve def‘-i zarar edecek mikdârını müceddeden binâya izin taleb ederim deyicek savb-ı şer‘den Mevlânâ Abdülbâkī Efendi ve Hâssa mi‘mârlardan üstâd el-Hâc Hasan ve Ali b. Abdullah irsâl olunup anlar dahi zikr olunan seddin üzerine varıp zeyl-i rakīmde muharrerü’l-esâmî olan müslimîn ile keşf ve nazar ettiklerinde, fi’l-vâki‘ zikr olunan seddin yedi zirâ‘ kaddi çatlayıp mezbûrların menzili üzerine meyl ve münhedim olmağa müşrif olduğun ve mezbûrların zararların müşâhede ettiklerinden sonra zikr olunan seddin tûlen on beş zirâ‘ ve kadden yedi zirâ‘ yerini müceddeden binâ ile zarar mündefi‘ olur deyû mi‘mârân-ı merkūmân ve sâir müslimîn icmâ‘ ve ittifâk ettiklerin Mevlânâ-yı mezbûr mahallinde tahrîr, ba‘dehû ma‘an irsâl olunan Memi Çelebi ile meclis-i şer‘a gelip haber verdiklerinden sonra binâya muhtâc olan mevâzi‘in def‘-i zarar edecek mikdârı kendi malı ile teberru‘an müceddeden binâya ba‘de’l-izin, mâ hüve’l-vâki‘ gıbbe’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem sene 1073.


Şuhûdü’l-hâl: Es-Seyyid Lütfullah el-Müezzin, Abdullah Efendi el-İmâm, Abdi Odabaşı, Mehmed Çelebi b. Bâli, Mehmed Ağa, el-Hâc Mehmed Efendi, el-Hâc Ömer birâder-i o, Kâtibü’l-hurûf Abdülbâkī Efendi.