|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 227 Hüküm no: 207 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yaho v. Niko ile Mitro v. Miyo’nun bozahânelerindeki eşyaların üçte bir hissesini Marko v. Peçko’ya sattıkları
Mülknâme-i hisse-i bozahâne Bozacı tâifesinden Yaho v. Niko ve Mitro v. Miyo nâm bozacılar meclis-i şer‘-i şerîf-i lâzımü’t-teşrîfde işbu bâ‘isü’s-sifr Marko v. Peçko muvâcehesinde her biri ikrâr ve takrîr-i kelâm edip Küçük Karaman’da vâki‘ icâre-i mu‘ayyene ile mutasarrıf olduğumuz bozahâne içinde mevcûd mülkümüz olan yirmi kova ve on ağaç sini ve on beş çömçe ve bir tencere ve iki balta ve iki fıçı ve bir küp ve bozahâneye müte‘allik beynimizde ma‘lûm eşyânın üç sehimden bir sehmini merkūm Marko’ya bey‘-i bâtt-ı sahîh-i şer‘î ile üç bin sekiz yüz nakd-i râyic fi’l-vakt akçeye bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûr üç bin sekiz yüz akçeyi mezbûr Marko yedinden tamâmen ahz u kabz eyledik ba‘de’l-yevm eşyâ-i mezbûrenin üç sehimde bir sehmi mezkûr Marko’nun mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde, gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem sene 1073.
Şuhûdü’l-hâl: Mehmed Beşe b. Abdullah, Hüseyin Beşe b. Sinan, Mustafa Beşe b. Sinan, Abdi Çelebi b. Hüseyin, Ali Beşe b. Osman, Hüseyin Beşe b. Kasım, Mihal v. Didin, Pemo v. Dimo, Petro v. Peçko.
|