.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 235
Hüküm no: 217
Orijinal metin no: [19a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


El-Hâc Anber Ali Ağa’nın arsasıyla su kuyusu ve duvarını Şâhin Ağa b. Abdülmennân’a sattığı

Mülknâme-i arsa Mahmiye-i İstanbul’da Sofular mahallesinde sâkin umdetü’l-emâcid ve’l-a‘yân el-Hâc Anber Ali Ağa tarafından husûs-ı âti’l-beyânı ikrâra vekîl olup Hacı Mehmed Beşe b. Ahmed ve Osman Beşe b. Mustafa şehâdetleri ile şer‘an vekâleti sâbite olan Ebûbekir Çelebi b. Mehmed meclis-i şer‘-i hatîrde işbu bâ‘isü’l-kitâb Şâhin Ağa b. Abdülmennân mahzarında bi’l-vekâle ikrâr ve takrîr-i kelâm edip müvekkil-i müşârün-ileyh el-Hâc Ali Ağa’nın silk-i mülkünde münselik olup mahall-i mezbûrede vâki‘ bir tarafı Belkıs nâm hâtuna meşrûta vakıf menzile ve bir taraf müvekkil-i mûmâ-ileyhin mülk bahçesine ve bir tarafı tarîk-i hâssa ve bir tarafı tarîk-i âma mahdûd tûlen yirmi yedi zirâ‘ ve arzen on sekiz bi hesâb-ı şatrancî dört yüz seksen altı zirâ‘ arsa-i hâliye ve su kuyusu ve müvekkil-i mûmâ-ileyhin bahçesi tarafında vâki‘ taş duvarı ile merkūm Şâhin Ağa’ya otuz bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber minvâl-i muharrer iştirâ ve tesellüm ve kabûl ve kabz eyledikden sonra semeni olan meblağ-ı mezbûr otuz bin akçeyi müvekkil-i müşârün-ileyh el-Hâc Ali Ağa müşterî-i merkūm Şâhin Ağa yedinden tamâmen alıp kabz eyledi ba‘de’l-yevm zikr olunan dört yüz yetmiş altı zirâ‘ ebniye ile su kuyusu ve taş duvar merkūm Şâhin Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Abdüllatif Efendi b. Halil el-İmâm, Mehmed Emin b. Ali el-Müezzin, el-Hâc Mehmed Efendi b. Nurullah, Süleyman Bey b. Mehmed el-Cündî İbrahim Efendi b. Çelebizâde, Ahmed Çelebi b. Cafer Ağa, Mehmed Çelebi b. Mustafa, Mehmed b. (...).