|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 236 Hüküm no: 218 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Meryem bt. Abdullah’ın boşandığı kocası Mehmed b. Mustafa ile sulh olduğu
Sulh Mahrûse-i Galata’ya tâbi‘ kasaba-i Tophâne’de Güğümbaşı odalarında sâkine Meryem bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i mutallıkı Mehmed b. Mustafa mahzarında ikrâr ve takrîr-i kelâm edip zevcim mezbûr Mehmed târih-i kitâbdan iki sene mukaddem talâk-ı bâyin ile beni tatlîk etmeğin zimmetinde mütekarrir ve ma‘kūdun-aleyh olan iki bin akçe mehr-i müeccelim kalmış idi. Da‘vâ ve taleb eylediğimde zikr olunan iki bin akçe mehr-i müeccelinden fâriğa olmak üzre benimle muhâla‘a-i sahîha ile muhâla‘a eylemişdin dedikde beynimizde münâza‘ât-ı kesîre vâkı‘a olmuş idi el-hâletü hâzihî tavassut-ı muslihîn ile beş yüz akçe üzerine beni inşâ-i akd-i sulh ettikde, ben dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi yedinden ahz u kabz eyledim ba‘de’l-yevm husûs-ı mezbûra müte‘allika da‘vâdan mezbûr Mehmed’in zimmetini ibrâ-i âm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Hasan b. Abdullah, Abdi Çelebi b. Hüseyin, Sadi b. Hüseyin, Resûl b. Rıdvan, Mehmed b. Ramazan.
|