|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 236 Hüküm no: 219 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Beşe b. Ali’nin el-Hâc Hasan b. Abdullah’taki alacağını terekesinden Âfitab bt. Abdullah’ın ödemesi gerektiği
Yüz elli guruş isbâtı Mahmiye-i İstanbul’da Seferikoz mahallesi sâkinlerinden râfi‘ü’l-kitâb Mehmed Bey b. Ali meclis-i şer‘-i hatîrde mahalle-i mezbûre sükkânından olup mukaddemâ fevt olan el-Hâc Hasan b. Abdullah’ın terekesine vâzı‘atü’l-yed olan zevce-i metrûkesi Âfitab bt. Abdullah muvâcehesinde da‘vâ edip mezbûr el-Hâc Hasan’a hayâtında mudârebeten yüz elli riyâlî guruş def‘ ve teslîm edip ol dahi tesellüm ve kabz ettikden sonra meblağ-ı mezbûr yedinde iken Mehmed Bey fevt olmağla tereke-i vâfiyyesinden bana lâzımü’l-edâ deynidir, mezbûreden terekesinden taleb ederim suâl olunsun dedikde gıbbe’s-suâl mezbûre Âfitab husûs-ı mezbûru münkire olıcak müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden olup mahalle-i mezbûra sâkinlerinden el-Hâc Mustafa b. Abdullah ve Ahmed b. Ebûbekir nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Mehmed Bey merkūm el-Hâc Hasan’a hayâtta iken mudârebeten huzûrumuzda yüz elli riyâlî guruş def‘ ve teslîm eyleyip mezbûr el-Hâc Hasan dahi vech-i muharrer üzre meblağ-ı mezbûru tesellüm ve kabz ettikden sonra mezbûr el-Hâc Hasan meblağ-ı mezbûr yedinde iken mücehhelen fevt olmağla meblağ-ı mezbûr terekesinden müdde‘î-i mezbûr Mehmed Bey’e lâzımü’l-edâ deynidir. Biz bu husûsa bu vech üzre şâhidleriz şehâdet dahi ederiz deyû her biri münkire-i mezbûre muvâcehesinde edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûra meblağ-ı mezbûrdan küllen ve ba‘zan müteveffâ-yı mezbûrun hayâtında ahz ve istîfâ veya hibe ve taraf-ı şer‘iyyeden bir tarîk ile zimmetini ibrâ etmediğine, ba‘de’t-tahlîfi’ş-şer‘î meblağ-ı mezbûru tereke-i vâfiyyesinden müdde‘î-i mezbûra teslîme mezbûre Âfitab’a tenbîh olunup mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Mehmed Efendi b. Mustafa el-İmâm, Ahmed Çelebi b. Mehmed Efendi, Davud Çavuş b. Şaban, Mehmed Bey b. Ramazan.
|