|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 237 Hüküm no: 220 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Yusuf’un eski kocası Mustafa Beşe b. İbrahim’den alacağını tahsil ettiği
Sulh Mahmiye-i İstanbul’da Emin Bey mahallesinde sâkine Fâtıma bt. Yusuf nâm hâtun meclis-i şer‘-i şerîf-i lâzımü’t-teşrîfde, zevc-i sâbıkı işbu bâi‘sü’l-kitâb Mustafa Beşe b. İbrahim mahzarında ikrâr ve takrîr-i kelâm edip mezbûr Mustafa Beşe zimmetinde cihet-i karz-ı şer‘îden yirmi beş esedî guruş hakkım ile mukaddemâ zevcesi olan Sâliha bt. Ahmed Kapudân nâm hâtunu tatlîk ettikde, mehr-i müecceli olan üç bin akçeyi mezbûre Sâliha’ya ver deyû bana emr edip ben dahi emrine binâ’en meblağ-ı mezbûr üç bin akçeyi mezbûre Sâliha’ya def‘ ve teslîm etmiş idim hâlâ meblağ-ı mezbûr üç bin akçe ile meblağ-ı merkūm yirmi beş esedî guruşu merkūmdan da‘vâ ve taleb eylediğimde ol dahi inkâr etmeğin beynimizde münâza‘ât-ı kesîre vukū‘undan sonra vesâtat-ı muslihîn ile merkūm Mustafa benimle bin akçe üzerine inşâ-i akd-i sulh ettikde, ben dahi sulh-ı mezbûru kabûl ve bedel-i sulh olan meblağ-ı mezbûr bin akçeyi mezbûr Mustafa Beşe yedinden tamâmen ahz u kabz eyledim ba‘de’l-yevm meblağ-ı mezbûra müte‘allika de‘âvî ve mütâlebâtdan mezbûr Mustafa Beşe’nin zimmetini ibrâ-i âm-ı kātı‘ü’n-nizâ‘ ile ibrâ eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Ali Çelebi berber, Ali b. Abdullah, Abdullah Efendi, Veli b. Mahmud, Abdi b. Hüseyin, Mehmed b. Ramazan, Resûl b. Rıdvan.
|