|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 238 Hüküm no: 221 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe bt. Mehmed’in Siyavuş Ağa b. Abdülmennân’a bey‘-i bi’l-istiğlâl yoluyla sattığı menzilini bir seneliğine kiraladığı
İstiğlâl Mahmiye-i İstanbul’da Seydî Bey mahallesinde sâkine Ayşe bt. Mehmed nâm hâtun tarafından ikrâr-ı âti’z-zikre vekîl olup mezbûreyi bi’l-ma‘rifeti’ş-şer‘iyye ârifân olan Süleyman Çelebi b. Dede Bâli ve Hızır Beşe b. Şaban şehâdetleri ile vekâleti sâbite olan sadrî oğlu Süleyman Çelebi b. Sinan meclis-i şer‘-i hatîrde hâfızü’l-kitâb Siyavuş Ağa b. Abdülmennân [ve] ikrâr-ı âtîyi tasdîke vekîl olan Mehmed Efendi b. Hasan mahzarında bi’l-vekâle ikrâr ve takrîr-i kelâm edip müvekkil-i mezbûr Siyavuş Ağa’dan iktirâz ve kabz eylediğim yüz seksen beş esedî guruşa mahalle-i merkūmede vâki‘ bir cânibi Ahmed Beşe b. Mehmed mülküne ve bir tarafı Molla Gürânî vakfına ve bir cânibi yine mezbûr Mehmed Beşe mülküne ve bir cânibi tarîk-i âma müntehî büyûtu hâvî mülk menzilimi bi tarîki’l-istiğlâl mezbûr Siyavuş Ağa’ya bey‘ ve teslîm ol dahi ber vech-i muharrer iştirâ ve tesellüm eyledikden sonra ba‘de’t-tahliyyeti’ş-şer‘iyye menzil-i mezbûru yirmi yedi esedî guruş ve üç rub‘a târih-i kitâbdan bir sene tamâmına değin mezbûr Siyavuş Ağa’dan istîcâr ve tesellüm edip mezbûr Siyavuş Ağa dahi bana îcâr ve teslîm eyledi dedikde gıbbe’t-tasdîki’l-mu‘teber mâ vaka‘a ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Mehmed b. el-Hâc Memi, Mustafa b. Süleyman, Süleyman b. Dede Bâli, Ahmed Çelebi b. Ali, keçecibaşı Mehmed Çelebi.
|