|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 249 Hüküm no: 240 Orijinal metin no: [21a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Belkıs Hâtun bt. Abdullah’ın muhterik menzil arsasını Abdülcelil Efendi’ye sattığı
Mülknâme-i arsa Sâbıkan vezîr-i a‘zam olup fevt olan Tabanıyassı demekle ma‘rûf Mehmed Paşa’nın kethüdâsı Süleyman Ağa’nın mahlûlesi olup hâlâ mahmiye-i İstanbul’da el-Hâc Bayram mahallesi sâkinelerinden olan Belkıs Hâtun bt. Abdullah meclis-i şer‘-i hatîrde râfi‘ü’l-kitâb umdetü’l-müderrisîni’l-kirâm Abdülcelil Efendi muvâcehesinde ikrâr ve i‘tirâf edip mahalle-i mezbûrede vâki‘ bir tarafı mukaddemâ başçı [21b] olduğu vakıf menzile ve bir tarafı imâma meşrûta vakıf menzile ve tarafeyni tarîk-i âma müntehî olup mülk-i mahzım olan muhterik menzil arsasını cemî‘ tevâbi‘i ve levâhıkı ve kâffe-i hukūk [ve] merâfıkı ile mûmâ-ileyh Abdülcelil Efendi’ye dört yüz elli esedî guruşa bey‘-i kat‘î ile bey‘ ve teslîm edip anlar dahi iştirâ ve tesellüm ve kabûl ettikden sonra semeni olan dört yüz elli esedî guruşu işbu hâzıre bi’l-meclis Ayşe Hâtun bt. Sefer’e zimmetimde bin riyâlî guruş deynim olmağla mûmâ-ileyh Efendi üzerine mezbûre Ayşe’yi havâle-i sahîha-i şer‘iyye ile havâle edip anlar dahi kabûl ettiklerinden sonra arsa-i mezbûre cemî‘ tevâbi‘i ile mezkûr Abdülcelil Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mukırra-i mezbûrenin ikrâr-ı meşrûhunu müşârün-ileyh Efendi vicâhen ve şifâhen tasdîk ve tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’t-tâsi‘ ve’l-ışrîn min [şehri] Şevvâli’l-mükerrem sene 1073.
Şuhûdü’l-hâl: Hüseyin Efendi, el-kadı, Ali Çelebi b. ( ), Ahmed Çelebi ed-Dâ‘î, el-Hâc Ahmed b. Mahmud.
|