.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 251
Hüküm no: 242
Orijinal metin no: [21b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sâfiye Kadın bt. Şeyh Mehmed’in Gürcü asıllı kölesini azat ettiği

Itâknâme A‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâil ve’l-me‘âlî metbû‘ü’l-efâzıl ve’l-e‘âlî hâlâ İstanbul kadısı olan Şeyh Mehmed Efendi’nin kerîme-i mükerremeleri fahrü’l-muhadderât tâcü’l-mestûrât aliyyetü’z-zât safiyyetü’s-sıfât Sâfiye Kadın taraflarından ıtk-ı âti’z-zikri ikrâra vekîl olup nehc-i şer‘î-i mu‘teber üzre vekâleti sâbite olan fahrü’l-akrân Abdünnebî Ağa meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilem müşârün-ileyhâ Sâfiye Kadın orta boylu açık kaşlı ( ) gözlü Gürciyyetü’l-asl hâfızatü’l-kitâb ( ) bt. Abdülmennân nâm memlûke câriyesini niyet-i hâlisa-i vâfiyye ve taviyyet-i tayyibe-i sâfiye ile hasbeten lillâhi aliyyi’l-azîm ve taleben li merzâti’r-rahîm malından âzâd ve mülkünden ihrâc ve silk-i harâir-i asliyyâta ilhâk ve idrâc eyledi. Min ba‘d câriye-i mevsûfe-i mezkûre sâir harâir-i asliyyât gibi hürre olup üzerinde velâdan gayrı hakkım bâkī kalmadı dedi dedikde mâ vaka‘a bi’t-taleb ketb olundu. Fî gurreti Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: Es-Sâbikūn.