.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 251
Hüküm no: 243
Orijinal metin no: [21b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kaplan v. Agop’un dört adet eşeği ile menzil ve bağını damadı Murad v. Ese’ye sattığı

Mülknâme-i menzil ve bağ ve hımâr Vilâyet-i Anadolu’da medîne-i Kayseriye’de Selbasdı mahallesinden olup hâlâ mahmiye-i İstanbul’da Vâlide Sultan Hanı’nda mütemekkin Kaplan v. Agop nâm Ermeni meclis-i şer‘-i hatîrde dâmâdı işbu hâmili’s-sifr Murad v. Ese nâm Ermeni muvâcehesinde ikrâr-ı tâm ve takrîr-i kelâm edip silk-i mülkümde münselik olup her re’si beşer riyâlî guruşa dört re’s erkek eşeğimi mezbûr Murad’a yirmi riyâlî guruşa bey‘ ve teslîm ol dahi ber minvâl-i muharrer iktirâz ve kabz eyledikden sonra mahalle-i mezbûrede vâki‘ etrâf-ı erba‘ası Varıcıoğulları ve Boyacıoğlu Bogaz ve Demirci Dido nâm zimmîler menzillerine ve tarîk-i âma müntehî üç bâb tahtânî odayı müştemil mülk menzilimi kırk riyâlî guruşa ve yine medîne-i mezbûrede Dipinecek nâm mevzi‘de vâki‘ etrâf-ı selâsesi Şeyh İbrahim Tennûrî evlâdının tasarrufunda olan tarlalara ve taraf-ı râbi‘i tarîk-i âm ile mahdûd olan bir kıt‘a mülk bağımı on riyâlî guruşa safka-i vâhide ile mezbûr Murad’a bâtten bey‘ edip ol dahi vech-i muharrer üzre iştirâ ve kabûl eyledikden sonra semenlerinden zimmetinde müctemi‘ olan yetmiş kıt‘a riyâlî guruşdan mezbûr Murad’ın zimmetini ibrâ ve iskāt eylediğimden sonra menzil-i mahdûd-ı mezkûru ve bağ-ı merkūmu kabz ve tasarrufa mesfûr Murad’ı taslît eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem li sene 1073.


Şuhûdü’l-hâl: Ahmed Beşe b. Abdullah, Süleyman Beşe b. Abdullah, Bayram Beşe b. Abdullah, Molla Ahmed b. Abdullah, Ali Beşe b. Abdullah, Mehmed Beşe b. Eskici Mahmud, Kapızâde Ali, İbrahim Beşe, Abdi Çelebi el-Muhzır, Vatris v. Sefer, Anter v. Sefer, Serkis v. Sefer, Ferhan v. Hırabalı.