.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 252
Hüküm no: 245
Orijinal metin no: [21b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Layo’nun eşi Katerina’nın İslâm’a gelmiş olan cariyeleri kafirlere sattığına dair olan ihbarın asılsız olduğu

Dergâh-ı âlî çavuşlarından Osman Çavuş b. Mehmed yedi ile vârid olan buyruldu-i şerîfin mazmûnunda bundan akdem mürd olan Layo’nun avratı Katerina nâm nasrâniyye İslâm’a gelmiş nice câriyeleri cem‘ edip kâfire götürmek üzre imiş, cânib-i şer‘-i hatîrden varılıp tecessüs ve o makūle İslâm’a gelmiş câriyeleri ve ol nasrâniyyeyi ihzâr oluna deyû buyurulmağın savb-ı şer‘-i mergūbdan Mevlânâ Abdülbâkī Efendi ve Emin Mustafa ve Abdi ve mübâşir-i mezbûr Osman Çavuş ma‘an irsâl olunup anlar dahi Fenerkapısı hâricinde vâki‘ mersûme Katerina’nın menziline varıp tecessüs ve tefahhus ettiklerinde, mezbûrenin sâkine olduğu menzilde dört re’s kendi mülk câriyeleri ve sekiz re’s zimmî yanaşma Boğdan re‘âyâsı nasrâniyyeler bulunup vech-i muharrer üzre zikr olunan câriyeler mülkü ve Boğdânî nasrâniyyeler mezbûrenin hizmetkârı olduğunu zeyl-i kitâbda muharrerü’l-esâmî olan kimesneler haberleri ile zâhir olup ba‘dehû zeyl-i kitâbda muharrerü’l-esâmî olan müslimîn ve nasârâdan mezbûrenin keyfiyeti suâl olundukda cevâblarında, mezbûre Katerina’nın şimdiye değin o makūle İslâm’a gelmiş müslime câriyeler cem‘ edip kâfire götüreceğin istimâ‘ etmedik, yaramaz hâli yoktur deyû her biri mezbûrenin iyiliğin haber vermeğin, vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan mezbûrlar ile meclis-i şer‘a gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî min Zilka‘deti’ş-şerîfe sene 1073.


Şuhûdü’l-hâl: Ramazan b. Bayram, Mustafa Çelebi b. el-Hâc Ömer, Mehmed b. Hasan berber, İbrahim Beşe b. Abdullah, Yusuf b. Mansur, Yamandi, Drako, Atanaş v. Yorgi, Mihalaki v. Kostantin, Yuvaki v. Aleksi.