|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 253 Hüküm no: 246 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Mustafa b. Abdullah’ın kölesi Cihan b. Abdullah’ın vârislerce azat edildiği
İkrâr bi’l-ıtk Vilâyet-i Rumeli’nde Görice kazâsına tâbi‘ Kubad nâhiyesi ahâlîsinden olup mukaddemâ vefât eden Mustafa b. Abdullah’ın verâseti kebîr oğulları Hüseyin ve Hasan ve Mustafa’ya münhasıra oldukdan sonra mezbûr Mustafa meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip hâlâ kasaba-i Ferecik’de voyvoda olan ( )’nın yava olmak zu‘muyla ahz ve yedinde mazbût olduğu istimâ‘ olunan Cihân b. Abdullah, mukaddemâ babam müteveffâ-yı mezbûr Mustafa’nın abd-i memlûkü olup ba‘de vefâtihî irsen üçümüze intikāl eyledikden sonra üçümüz mezbûr Cihân’ı tahrîr ve i‘tâk etmekle mezbûr Cihân sâir ahrâr-ı asliyyîn gibi hür olup üzerinde velâdan gayrı hakkımız bâkī kalmamışdır deyû ikrâr etmeğin ikrâr-ı mezbûr bi’t-taleb ketb olundu. Fî gurreti Zilka‘deti’ş-şerîfe sene 1073.
Şuhûdü’l-hâl: Ahmed Beşe b. Hasan, Hüseyin Beşe b. Mehmed, Ahmed b. İbrahim, Mustafa b. Süleyman, Mehmed b. Hüseyin, Mehmed b. Ali, Abdi Çelebi el-Muhzır, Mehmed b. Ramazan.
|