.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 262
Hüküm no: 261
Orijinal metin no: [23a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Afife bt. Receb’in Hüseyin b. Mehmed’den muhâlaa yoluyla boşandığı

Hul‘ Mahmiye-i İstanbul’da Mi‘mâr Sinan mahallesinde sâkine Afife bt. Receb Bey nâm hâtun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân mahalle-i mezbûre imâmı Mehmed Efendi b. Ali ve Hüseyin b. Muslihiddin nâm kimesneler şehâdetleri ile şer‘an vekâleti sâbite olan vâlidesi Hatîce bt. Yusuf nâm hâtun meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-kitâb Hüseyin b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûrenin mezbûr Hüseyin zimmetinde mütekarrir ve ma‘kūdun-aleyh olan dört bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre vekâletim hasebiyle mezbûr Hüseyin ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan vekâletim hasebiyle mezbûr Hüseyin’in zimmetini ben ve mezbûr Hüseyin dahi müvekkilem mezbûre Afife’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Zilka‘deti’ş-şerîfe li sene 1073.


Şuhûdü’l-hâl: Mustafa b. Veli, Ahmed Çelebi b. Bahşi, Receb Çelebi b. el-Hâc Murad, Ahmed b. Mustafa el-Müezzin, Receb Subaşı b. Muslihiddin, Ali Ağa b. Ferruh, Fazlı Ağa b. Ferruh, Mustafa bin Osman, Mehmed Halîfe el-İmâm, Abdullah b. İbrahim, İsmail Çelebi b. Mehmed, İbrahim Çelebi b. Mehmed.