|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 264 Hüküm no: 264 Orijinal metin no: [23a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Cihan bt. Murad’ın menzilini oğlu Haçador v. Pilor’a sattığı
Mülknâme-i arsa Mahmiye-i İstanbul’da Kâtib Kasım mahallesi sâkinelerinden Cihân bt. Murad nâm nasrâniyye meclis-i şer‘-i hatîrde sulbî oğlu işbu bâ‘isü’s-sifr Haçador v. Pilor nâm zimmî mahzarında ikrâr ve takrîr-i kelâm edip silk-i mülk-i sahîhinde münselik olup mahalle-i mezbûrede vâki‘ bir tarafı Şedci Budak ve bir tarafı ba‘zan Hasan Beşe mülkü ve ba‘zan bâyi‘a-i mezbûre mülkü ve bir tarafı Belkıs Hâtun mülkü ve bir tarafı tarîk-i âma müntehî muhterik mülk menzil arsası ve içinde müşterek bir bi’r-i mâ ve üzerinde olan enkāzı ile mezbûr Haçador’a otuz bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr otuz bin akçeyi müşterî-i mezbûr Haçador yedinden tamâmen ahz u kabz eyledim ba‘de’l-yevm zikr olunan menzil arsası ve üzerinde olan enkāzı ve müşterek bi’r-i mâyı müşterî-i merkūm Haçador’un mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Zilka‘deti’ş-şerîfe li sene 1073.
Şuhûdü’l-hâl: Hüseyin Beşe, Mehmed Çelebi, İsmail Çelebi, Ahmed Beşe, Mustafa Beşe, Hasan Efendi el-Müezzin, Abdi Çelebi b. Hüseyin, Şükrullah Çelebi b. Mustafa, Mehmed Efendi, İbrahim Efendi, Yahya b. Abdullah, Keşfî Mustafa Efendi b. Muharrem, Hüseyin b. Süleyman, Papasoğlu Eremya, Bağdasar v. Hürmüz, Murad v. ( ).
|