|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 265 Hüküm no: 266 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Huri bt. Minas’ın Meliki bt. Sinan’a olan borcuna karşılık iki adet işlemeli yorgan yüzünü rehin verdiği
Vekâlet-i devriye Mahmiye-i İstanbul’da Mirahor mahallesi sâkinelerinden Huri bt. Minas nâm nasrâniyye meclis-i şer‘-i hatîrde işbu bâ‘isü’s-sifr Meliki bt. Sinan nâm nasrâniyye muvâcehesinde ikrâr ve takrîr-i kelâm edip mezbûre Meliki yedinden müşterâ ve makbûz sandal üzerine kilâbdân ile işleme altı tane yorgan yüzü semeninden târih-i kitâbdan yüz yirmi gün tamâmına müeccel doksan iki esedî guruş deynim olup mukābelesinde bir elmas hâtem ile dülbend üzerine kilâbdân ile işleme iki yorgan yüzünü mezbûre Meliki yedine rehin vaz‘ ve teslîm eylediğimden sonra, eğer ecel-i merkūm hulûlünde meblağ-ı mezbûr doksan iki esedî guruşu edâ ve teslîm edemezsem rehn-i mezbûru semen-i misli ile âhara bey‘ ve semeninden deyn-i mesfûru tamâmen ahz u kabz eyledikden sonra ziyâdesini bana teslîme vekâlet-i devriye ile mezbûre Meliki’yi tarafımdan vekîl ve nâib-i menâb nasb u ta‘yîn eyledim, ol dahi kabûl ve hizmet-i lâzımesin edâya ta‘ahhüd eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene 1073.
Şuhûdü’l-hâl: Süleyman b. Hasan, Abdi Çelebi b. Hüseyin, Şükrullah b. Mustafa, Resûl b. Rıdvan, Mehmed b. Ramazan, Asadur v. Mardiros, Asadur v. Ferhad.
|