.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 266
Hüküm no: 268
Orijinal metin no: [23b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hâtun bt. Hasan’ın vefat eden eşi Fortacı Osman Ağa’dan satın aldığı menzil ve bağa elkoyan İsâ Efendi’nin haksız olduğu

Hükm-i menzil ve bağ Mahmiye-i İstanbul’da Ördek Kasap mahallesi ahâlîsinden olup hâlâ Mısır’da misâfiren sâkin olan Fortacı Osman Ağa b. Gazanfer’in sâbıkan zevcesi olan fahrü’l-muhadderât Fâtıma Hâtun bt. Hasan Efendi meclis-i şer‘-i hatîr-i lâzımü’t-tevkīrde sâbıkan Edirne kadısı olup zikri âtî mülk menzil ile bağa vâzı‘u’l-yed olduğu şer‘an sâbit olan İsâ Efendi tarafından husûs-ı âti’z-zikre vekîl olup mahmiye-i merkūmede Tatlıkuyu’da sâkin Ali b. Mehmed ve Karagümrük kurbunda sâkin Ahmed b. Mehmed nâm kimesneler şehâdetleri ile vekâleti sâbite olan fahrü’l-kuzât Mahmud Efendi b. el-Hâc İbrahim mahzarında üzerine da‘vâ edip mukaddemâ mezbûr Osman Ağa’nın mülkü olup Yoros kazâsına tâbi‘ Anadolu Hisârı’nda vâki‘ bir tarafı sâbıkan Vezîr-i a‘zam olan Sâlih Paşa mülküne ve bir tarafı sâbıkan şeyhülislâm olan Ebûsaid Efendi mülküne ve bir tarafı sâhil-i bahre ve bir tarafı tarîk-i âma müntehî büyûtu hâvî menzilini ve kurbunda vâki‘ lede’l-ahâlî ma‘lûmü’l-hudûd bir kıt‘a bağını, bin altmış yedi senesi Şa‘bânı’nın on birinci gününde zevciyyet beynimizde kāime iken safka-i vâhide ile üç bin beş yüz riyâlî guruşa bana bâtten bey‘ ve teslîm ve kabz-ı semen-i mezbûr eyledikden sonra, a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în hâlâ Rumeli kazaskeri olan Abdülkādir Efendi hazretleri İstanbul kadısı iken nâibi olan fahrü’l-müderrisîn Abdülbâkī Efendi huzûrunda vech-i muharrer üzre bey‘ini ve semeni olan meblağ-ı mezbûru kabzını ikrâr ve yedime ikrârını hâviye hüccet verip ol menzil ve bağ mülk-i müşterâm olup mutasarrıfe iken müşârün-ileyh İsâ Efendi ol menzil ve bağa bî-vech vaz‘-ı yed eder hâlâ vekîli olan mezbûr Mahmud Efendi’den suâl olunup kasr-ı yedine tenbîh olunmak matlûbumdur, deyû mazmûnu takrîr-i meşrûhunu nâtık ve Mevlânâ-yı mezbûrun imzâ ve hâtemini hâvî ve târih-i mezbûr ile müverraha bey‘ hücceti ibrâz edip mezbûr Mahmud Efendi muvâcehesinde kırâ’at ve suâl olundukda mezbûr Mahmud Efendi cevâbında fi’l-vâki‘ mezbûr Osman Ağa mukaddemâ zikr olunan menzil ve bağı müvekkilim müşârün-ileyh İsâ Efendi’ye semen-i misli ile bey‘ ve semeninden bin yüz elli riyâlî guruşu deyni olan bin yüz elli riyâlî guruş için îfâ ve fazlasını kabza mahmiye-i merkūmede Arpa Emîni mahallesi imâmı olan gāib ani’l-meclis Hasan Efendi’yi vekîl etmekle ol dahi târih-i kitâbdan yirmi gün mukaddem iki yük akçe[ye] müşârün-ileyhe bey‘ ve teslîm ve semeninden bin yüz elli riyâlî guruşunu deyn-i mezbûre takâs ve müşârün-ileyh İsâ Efendi dahi takâs-ı mezbûru kabûl etmiş idi hâlâ mezbûr Osman Ağa târih-i mezbûrda üç bin beş yüz riyâlî guruşa mezbûre Fâtıma Hâtun’a bey‘ ve teslîm ve kabz-ı semen eyledikden sonra Mevlânâ-yı mezbûr huzûrunda vech-i muharrer üzre bey‘ ve teslîm ve kabz-ı semen eylediğini ikrâr edip yedime ikrârını hâviye işbu hücceti verdiği müvekkilim müşârün-ileyhin ma‘lûmu değildir, deyû mazmûn-ı hücceti inkâr eyledikde müdde‘iyye-i mezbûre Fâtıma Hâtun’dan mazmûn-ı hücceti mübeyyine beyyine taleb olundukda zeylinde isimleri mastûr udûl-i müslimînden İmâm Mahmud Efendi b. Hasan ve Hasan Efendi b. Hamza ve Mustafa Beşe b. Yusuf ve Abdi Beşe ve İbrahim b. Süleyman nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâdi’ş-şer‘î fi’l-vâki‘ mezbûr Osman Ağa târih-i mezbûrda zevciyyet beynlerinde kāime iken ol menzil ve bağı semen-i mezbûr üç bin beş yüz riyâlî guruşa merkūme Fâtıma Hâtun’a safka-i vâhide ile huzûrumuzda bey‘ ve teslîm ve semen-i mezbûr üç bin beş yüz riyâlî guruşu kabz eyledikden sonra, vech-i muharrer üzre bey‘ ve teslîm ve kabz-ı semen eylediğini Mevlânâ-yı mezbûr huzûrunda ikrâr edip yedine ikrârını hâviye işbu bey‘ hücceti verdi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın zikr olunan menzil ve bağdan müvekkil-i müşârün-ileyhin kasr-ı yedine tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâdis min Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: Hasan Çavuş el-Mübâşir, Hüseyin Efendi el-Brusî el-Kâtib, Keşfî Mustafa Efendi el-Kâtib, Ali Çelebi b. Mustafa müezzin-i mahalle-i Arpa Emîni, Mustafa Beşe b. Murad, Fahrü’l-akrân Kethüdâ Abdünnebî Ağa, Mefharü’l-emâsil ve’l-akrân Muhtesib Ağası Mehmed Ağa, Mehmed Ağa b. Mahmud sermuhzırân, Abdülkādir Efendi el-kadı.