.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 274
Hüküm no: 281
Orijinal metin no: [24b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Beşe b. Mehmed’in, vefat eden Veli Beşe b. Haydar’ın vârisleri hakkındaki iddiasını ispat için mühlet verildiği

Mehil Vilâyet-i Anadolu’da kasaba-i İznikmid’de sâkin olup mukaddemâ vefât eden Veli Beşe b. Haydar nâm râcilin verâseti, zevce-i metrûkesi Havva bt. Abdünnebî nâm hâtun ve babası mezbûr Haydar’a ve anası Ayşe ve sulbiye sagīre kızı Fâtıma’ya münhasıra oldukdan sonra, Dergâh-ı âlî yeniçerilerinin elli dördüncü cemâ‘atine mahsûs odanın hâlâ odabaşısı ve vakıf akçesine mütevellîsi Ahmed Beşe b. Mehmed nâm râcil meclis-i şer‘de müteveffâ-yı mezbûrun vâlidesi mezbûre Fâtıma Hâtun ile sagīre-i mezbûrenin mansûben vasîsi olan mezbûr Abdünnebî mahzarlarında üzerlerine bi’t-tevliyye da‘vâ edip müteveffâ-yı mezbûr Veli Beşe hâl-i sıhhatinde mâl-ı vakıfdan mütevellî-i sâbık yedinden karz aldığı otuz bin akçeyi cânib-i vakfa edâ etmeden fevt olup zimmetinde kalmağla terekesinden bi’t-tevliyye taleb ederim suâl olunsun dedikde gıbbe’s-suâl mezbûrân cevâblarında, tereke-i müteveffâ-yı mezbûra vaz‘-ı yedlerini ve müteveffâ-yı mezbûrun vakf-ı mezbûra otuz bin akçe deyni olduğunu inkâr eylediklerinde müdde‘î-i mezbûrdan müdde‘âları için beyyine taleb olundukda udûl-i müslimînden olup oda-i mezkûre ahâlîsinden Abdülkerim Beşe b. Şaban ve Fazlı Beşe b. İsmail nâm râcil li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ müteveffâ-yı mezbûr Veli Beşe hâl-i sıhhatinde vakf-ı mezbûrdan mütevellî-i sâbık yedinden huzûrumuzda karz otuz bin akçe alıp meblağ-ı mezbûru cânib-i vakfa kable’l-edâ fevt oldu. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm terekeye vaz‘-ı yedleri için mütevellî-i mezbûrdan sâniyyen beyyine taleb olundukda ityân-ı beyyine [25a] için istimhâl eyledikde mehl-i şer‘î ile imhâl olunmağın, mâ vaka‘a bi’t-taleb ketb olundu. Fi’l-yevmi’t-tâsi‘ min Zilka‘deti’ş-şerîfe li sene selâse ve seb‘în ve elf.


Şuhûdü’l-hâl: El-Hâc Abdülkādir b. Ebûbekir, Hüseyin Beşe b. Ali er-Râcil, Mustafa Beşe b. Hüseyin er-Râcil, Abdi Beşe b. Abdürrezzak, Ahmed Çelebi b. Ömer, el-Hâc Ahmed Çelebi b. Mahmud, el-Hâc Veli b. Hüseyin, çukadar Ali Beşe er-Râcil.