|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 275 Hüküm no: 283 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı İbrahim’in, Hüseyin Dede aleyhine açtığı duvar davasında haksız olduğu
Yemîn Husûs-ı âti’l-beyânın mahallinde istimâ‘ ve tahrîri için savb-ı şer‘den bi’t-taleb irsâl olunan Mevlânâ Mehmed Efendi, mahmiye-i İstanbul’da Manisalı Çelebi mahallesinde vâki‘ zikri âtî mülk duvarın üzerine varıp zeyl-i rakīmde mastûrü’l-esâmî müslimîn huzûrunda akd eylediği meclis-i şer‘de mahalle-i mezbûre sâkinlerinden el-Hâc İbrahim nâm kimesne zikr olunan duvara müstakil mülkü olmak üzre vâzı‘u’l-yed olduğu sâbit olan Hüseyin Dede b. Mehmed mahzarında üzerine da‘vâ ve takrîr-i kelâm edip mezbûr Hüseyin Dede menzili ile benim menzilim beyninde olup tûlen sekiz buçuk ve arzen on dört usbu‘ duvar mezbûr Hüseyin Dede ile müşterek mülkümüz iken mezbûr Hüseyin Dede zikr olunan duvarın mecmû‘u kendi mülkü olmak üzre vaz‘-ı yed eder hâlâ zikr olunan duvar müşterek tasarrruf olunmak için mezbûr Hüseyin Dede’ye tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsı için beyyine taleb olundukda ityân-ı beyyineye kādir olmayıp istihlâf etmeğin zikr olunan duvarın nısf-ı şâyi‘i müdde‘î-i mezbûr el-Hâc İbrahim’in mülkü olmadığına mezbûr Hüseyin Dede’ye yemîn teklîf olundukda ol dahi hasbe’l-mes’ûl half billâhi’l-aliyyi’l-a‘lâ etmeğin mezbûr el-Hâc İbrahim bilâ-beyyine mu‘ârazadan men‘ birle vâki‘ hâli Mevlânâ-yı mezbûr mahallinde tahrîr ba‘dehû meclis-i şer‘a gelip ma‘an irsâl olunan Hüseyin b. Ebubekir ile alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Zilka‘deti’ş-şerîfe li sene selâse ve seb‘în ve elf.
Şuhûdü’l-hâl: Mustafa Efendi b. Mehmed el-İmâm, Mehmed Çelebi b. Mehmed el-Müezzin, Sofu Ahmed b. Ahmed el-mi‘mâr, üstâd Mehmed b. Süleyman, Davud b. Süleyman, Mehmed b. Ali, Rıdvan b. Abdullah, Mustafa Çelebi b. Veli, Mahmud Çavuş b. Nasûh.
|