|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 276 Hüküm no: 284 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rahime bt. Abdullah’ın Yusuf b. Mehmed’den muhâlaa yoluyla boşandığı
Hul‘ Mahmiye-i İstanbul’da Sultan Selim kurbunda Çukurbostan mahallesinde sâkine Rahime bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-vesîka Yusuf b. Mehmed mahzarında ikrâr ve takrîr-i kelâm edip mezbûr Yusuf’un zimmetinde mütekarrir ve ma‘kūdun-aleyh olan sekiz yüz akçe mehr-i müeccelim ile nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene 1073.
Şuhûdü’l-hâl: Ali Efendi b. Mehmed el-İmâm, Bayram Beşe b. Mehmed, Şaban b. Şaban, Ebûbekir b. Mehmed, el-Hâc Ahmed b. Mahmud.
|