.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 277
Hüküm no: 286
Orijinal metin no: [25a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ayşe Hâtun bt. Mehmed’in boşandığı eşi Ali Çelebi b. Cafer’den mehr-i müeccel ve nafaka bedelini tahsil ettiği

İkrâr-ı kabz-ı mehr ve nafaka Husûs-ı âti’l-beyânı mahallinde tahrîr için cânib-i şer‘-i mergūbdan bi’t-taleb irsâl olunan Abdülbâkī Efendi, mahmiye-i İstanbul’da Tercüman Yunus mahallesinde sâkine Ayşe Hâtun bt. Mehmed’in menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘ eyledikde mezbûre Ayşe hâtun meclis-i mezbûrda zevc-i mutallıkı Ali Çelebi b. Cafer muvâcehesinde da‘vâ edip mezbûr Ali Çelebi beni tatlîk etmekle zimmetinde mütekarrir olan yüz riyâlî guruş mehr-i müeccel-i müsemmâyı taleb ederim deyicek gıbbe’s-suâl mezbûr Ali Çelebi cevâbında fi’l-vâki‘ müdde‘iyye-i mezbûrenin zimmetimde yüz riyâlî guruş mehr-i müecceli vardır deyû tâyi‘an ikrâr ve i‘tirâf ettikden sonra, ikrârı mûcebince mehr-i mezbûru müdde‘iyye-i mezbûre Ayşe’ye edâya tenbîh ettikden sonra mezbûre Ayşe meclis-i mezbûrda i‘tirâf edip mehrim olan meblağ-ı mezbûr yüz guruşu ve nafaka-i iddetim için dört yüz kırk akçeyi zevcim mezbûr Ali Çelebi yedinden alıp kabz eyledim dedikde gıbbe’t-tasdîki’l-vicâhî vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Mustafa Beşe ve Muhzır Mustafa ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’l-iltimâs ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene 1073.


Şuhûdü’l-hâl: İsmail Çelebi b. Mehmed, es-Seyyid Hasan Çelebi b. Musa, Abdünnebî Çelebi b. Ahmed, Mehmed Çavuş b. Abdünnebî.