.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 278
Hüküm no: 287
Orijinal metin no: [25a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice bt. Hüseyin’in düğme bedeli olarak Havva bt. Yahya’da olan alacağından bir kısmını tahsil ettiği

İbrâ Mahmiye-i İstanbul’da Hüsrev Paşa mahallesinde sâkine Hatîce bt. Hüseyin nâm hâtun meclis-i şer‘-i hatîr-i lâzımü’t-tevkīrde bâ‘isetü’l-vesîka Havva bt. Yahya nâm hâtun mahzarında ikrâr ve takrîr-i kelâm edip târih-i kitâbdan yirmi gün mukaddem her biri birer miskāl altından masnû‘ dört bin sekiz yüz akçe kıymetli on altı aded düğmelerimi mezbûre Havva Hâtun’a bi tarîki’l-âdiye verip ol dahi vech-i muharrer üzre istifâde ve kabz eylediğinden sonra hıfzında taksîrine binâ’en yedinde zâyi‘ olmağın üzerine damânı terettüb eylemiş idi hâlâ zikr olunan düğmelerin kıymetinin iki bin beş yüz akçesini yedinden alıp kabz edip iki bin üç yüz akçesinden zimmetini ibrâ ve iskāt eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’t-tâsi‘ min Zilka‘deti’ş-şerîfe li sene 1073.


Şuhûdü’l-hâl: Hasan Efendi b. Mustafa el-İmâm, Ali Çelebi b. İbrahim, Fazlullah b. Abdullah, Abdi Çelebi b. Hüseyin.