|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 279 Hüküm no: 290 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kasap Kurt Beşe b. Abdullah kestiği koyun ve keçilerin yağını mumcu esnafından Dimo v. Şiro ve Nikol v. Yani’ye vereceğini ta‘ahhüd ettiği
Ta‘yîn-i selhhâne Mahmiye-i İstanbul’da Balıkpazarı’nda vâki‘ merkūm Ebû Said Efendi mahdûmları Ahmed Efendi tasarrufunda olan ma‘lûmü’l-hudûd mumhânenin müste’ciri olan Dimo v. Şiro nâm zimmî meclis-i şer‘-i hatîrde mahmiye-i mezbûrede vâki‘ kasap tâifesinden Kurt Beşe b. Abdullah mahzarında takrîr-i kelâm ve bast-ı merâm edip kadîmden mahmiye-i mezbûrede vâki‘ selhhânelerde zebh olunan koyun ve keçinin iç yağı mahmiye-i mezbûrede mumhânelerine ta‘yîn ve bey‘ olunmak mu‘tâd-ı kadîm olmağla mezbûr Kurt Beşe’nin dahi Sultan Bayezid kurbunda vâki‘ ma‘lûmü’l-hudûd selhhânesinde zebh eylediği koyun ve keçinin yağları mukaddemâ kethüdâ ve ihtiyârlarımız ma‘rifeti [ile] benim mumhâneme ta‘yîn olunmuşidi. El-hâletü hâzihî mezbûr Kurt Beşe, nezirsiz zikr olunan yağı kış izzeti vaktinde alırsız, yazın kesreti zamânında almazsız deyû hilâf-ı mu‘tâd-ı kadîm âhara füruht etmekle beynimizde sebeb-i kīl u kāl ve bâ‘is-i ihtilâl olmağın hâlâ kethüdâ ve ihtiyârlarımız ma‘rifeti ile mezbûr Kurt Beşe’nin selhhânesinde zebh olunan koyun ve keçinin yağını izzet ve kesreti vaktinde benim mumhânem ile Eminönü’nde vâki‘ ma‘lûmü’l-hudûd mumhânenin müste’ciri olan işbu Nikola v. Yani nâm zimmînin mumhânesine ta‘yîn ve bey‘ olunmak üzre mezbûr Kurt Beşe ile tecdîd-i ittifâk ve ahd ü mîsâk etmişizdir. Vech-i muharrer üzre olan ittifâkımız mezbûr Kurt Beşe’den suâl olunup takrîr, tahrîr ve sûreti yedimize verilmek matlûbumuzdur dedikde gıbbe’s-suâl mezbûr Kurt Beşe cevâbında vech-i mübeyyen üzre beynlerinde ittifâk olduğunu tahkīk ve tasdîk edip min ba‘d selhhânesinde zebh olunan koyun ve keçinin yağını mezbûrâna vermeğe ta‘ahhüd etmeğin hıfzen li’l-makāl mâ vaka‘a bi’t-taleb ketb olundu. Min Zilka‘de sene 1073.
Şuhûdü’l-hâl: Du‘âyî Ahmed Çelebi b. ( ), Ömer Bey b. Abdullah, Ali b. Muharrem, Hüseyin b. Ebûbekir, Şükrullah Çelebi.
|