|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 280 Hüküm no: 291 Orijinal metin no: [25b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çavuş b. Abdülbâki Çavuş’un Kapan Hanı ve Kefeli hanlarında olan hissesini Hacı İbrahim Çelebi b. el-Hâc Receb’e sattığı
Mülknâme Vilâyet-i Anadolu’da Lârende kasabası mahallâtından el-Hâc Abbas mahallesi sükkânından Mehmed Çavuş b. Abdülbâkī Çavuş meclis-i şer‘-i hatîr-i lâzımü’t-tevkīrde işbu bâ‘isü’l-kitâb fahrü’l-akrân el-Hâc İbrahim Çelebi b. el-Hâc Receb mahzarında ikrâr ve takrîr-i kelâm edip kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd Kapan Hânı ve Kefeli Hânı demekle ma‘rûf hânlar babam müteveffâ-yı merkūm Abdülbâkī Çavuş’un ile’l-vefât mülkü ve hakkı olup ba‘de vefâtihî terekesi altı sehim i‘tibâr olunup iki sehimi bana ve iki sehimi karındaşım Mustafa Çavuş’a ve birer sehimi kız karındaşlarım Ayşe ve Emine’ye isâbet ve intikāl edip bu âna değin mezbûrun ile müşâ‘an mutasarrıflar idik hâlâ zikr olunan hânlarda olan iki sehim hisse-i şâyi‘amı merkūm Hacı İbrahim Çelebi’ye otuz üç bin beş yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ol dahi iştirâ ve kabûl eyledikden sonra semeni olan meblağ-ı mezbûr otuz üç bin beş yüz akçeyi müşterî-i mezbûr el-Hâc İbrahim Çelebi yedinden tamâmen ahz u kabz edip zikr olunan hânlarda olan iki sehim hisse-i şâyi‘amı mahallinde kabz ve tasarrufa mezbûr el-Hâc İbrahim Çelebi’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene 1073.
Şuhûdü’l-hâl: El-Hâc Yahya Çelebi b. Ali, el-Hâc Mehmed Çelebi b. el-Hâc Ahmed, el-Hâc Hasan Çelebi b. Mehmed, el-Hâc Mustafa b. Sefer, Ali Beşe b. el-Hâc Mehmed, Ahmed Bey b. Mehmed.
|