|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 280 Hüküm no: 292 Orijinal metin no: [25b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
El-Hâc Musa’nın vârisleri Mustafa ve Ayşe’nin el-Hâc Ömer b. Abdünnebi aleyhindeki davalarının reddedildiği
Men‘ Mahmiye-i İstanbul hısnı ebvâbından Yenikapı kurbunda sâkin iken vefât eden el-Hâc Musa’nın hasren vârisleri sulbî kebîr oğlu Mustafa ve sulbiye kebîre kızı Ayşe meclis-i şer‘-i hatîr-i lâzımü’t-tevkīrde zikri âtî vakıf akçenin hasbî mütevellîsi el-Hâc Ömer b. Abdünnebî mahzarında her biri üzerine da‘vâ edip mûrisimiz müteveffâ-yı mezbûr el-Hâc Musa târih-i kitâbdan kırk sene mukaddem maraz-ı mevtinde Saraçhâne’de bir musluğa beş bin akçe ifrâz ve vasiyyet ve musırran aleyhâ fevt oldukda, ism-i mal ıtlâk olunur şey terk etmeyip lâkin mütevellîsi kırk sene meblağ-ı mezbûru huzûrumuzda vakfiyet üzre tasarruf eyledikde bizler hâzır ve bilâ-özr-i şer‘î sükût edip mütevellîsinden meblağ-ı mezbûra müte‘allik bir şey da‘vâ eylememiş idik. El-hâletü hâzihî fakīr olmağla meblağ-ı mezbûru mütevellîsi olan el-Hâc Ömer’den taleb eder[iz] suâl olunsun dedikde mezbûrân mütevellî-i vakf ile kırk sene bir yerde sâkinler olup hâzır ve bilâ-özr-i şer‘î sükût edip meblağ-ı mezbûra müte‘allik bir şey da‘vâ eylemediklerini tav‘an ikrâr eylediklerinde otuz dört sene mürûr edip bilâ-özr-i şer‘î sükût olunup terk olunan mülk da‘vâsının istimâ‘ı bilâ-emr memnû‘ olmağla mezbûrân Mustafa ve Ayşe bî-vech da‘vâdan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Ahmed Çelebi b. Hüseyin, Mahmud Çelebi, Ömer Çelebi, Osman Çelebi b. Ömer, Mehmed Çelebi b. Murad, Ali b. Ömer, Sâlih b. Abdi.
|