|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 281 Hüküm no: 293 Orijinal metin no: [25b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Arutin v. Şâhin’in Vartiz v. Gencibey’den dava ettiği evin kendisine teslim edilmesi
Şuf‘a Fi’l-asl medîne-i Kayseriye kurâsından Balaksi nâm karye ahâlîsinden olup mahmiye-i İstanbul’da Davud Paşa câmi‘i kurbunda sâkin olan Arutin v. Şâhin nâm Ermeni meclis-i şer‘-i hatîrde zikri âtî mülk menzile vâzı‘u’l-yed olduğu şer‘an sâbit olan Vartiz v. Gencibey nâm Ermeni muvâcehesinde üzerine da‘vâ edip târih-i kitâbdan üç sene mukaddem merkūm Gencibey’den karye-i merkūmede vâki‘ bir cânibi Marko Ermeni mülküne ve bir cânibi Andriyas Ermeni ve bir cânibi Marko Ermeni mülküne ve bir cânibi tarîk-i âma müntehî bir sofa ve tabhâne ve örtme ve havluyu müştemil mülk menzilini seksen riyâlî guruşa iştirâ ve kabz eylediğimden sonra, menzil-i mezbûrun câr-ı mülâsıkı mezbûr Vartiz bey‘-i mezbûru mahmiye-i merkūmede istimâ‘ eyledikde sükût etmekle mezbûrdan [26a] hakk-ı şuf‘a sâkıt olmuş iken, şerâit-i şuf‘ayı bi tamâmihâ ri‘âyet eyledim deyû da‘vâ-yı şuf‘a edip hevâsına tâbi‘ hâkimü’ş-şer‘ mu‘âveneti ile semen-i mezbûru yedimden almış idi hâlâ mezbûrdan suâl olunup semen-i mezbûru, mezbûra red ve menzil-i mezbûru merkūm Vartiz’den almak murâd ederim, suâl olunsun dedikde gıbbe’s-suâl mezbûr dahi cevâbında kaziyye minvâl-i muharrer üzre olduğunu ikrâr edicek ikrârı mûcebince semen-i mezbûru alıp menzil-i mezbûru mahallinde mezbûr Arutin Ermeni[’ye] teslîme mezbûr Vartiz’e tenbîh olunup mâ vaka‘a bi’t-taleb ketb olundu. Fi’l-yevmi’l-âşir min Zilka‘de sene 1073.
Şuhûdü’l-hâl: Ahmed Çelebi b. Mahmud kethüdâ-yı muhzırân, Abdi Çelebi el-Muhzır, Şükür Bey el-Muhzır, Veli b. Mahmud el-Muhzır, Mehmed b. Ramazan el-Muhzır, çukadar Ali Beşe er-Râcil.
|