|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 282 Hüküm no: 294 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
El-Hâc Hüsrev Beşe b. Abdullah’ın çiftlik, menzil, tarla ve çayırını oğlu Halil Çelebi’ye sattığı
Mülknâme-i çiftlik Mahmiye-i İstanbul’da Sarı Nasûh mahallesinde sâkinlerinden el-Hâc Hüsrev Beşe b. Abdullah meclis-i şer‘-i hatîr-i lâzımü’t-tevkīrde sulbî kebîr oğlu işbu bâ‘isü’l-kitâb Halil Çelebi muvâcehesinde ikrâr ve takrîr-i kelâm edip vilâyet-i Anadolu’da Erzurum kazâsına tâbi‘ Kirahar nâm karyede vâki‘ lede’l-ahâlî ve’l-cîrân ma‘lûmü’l-hudûd beş bâb tahtânî odaları müştemil mülk çiftliğimi, içinde mevcûd olan adedi beynimizde ma‘lûm kara sığır öküzü ve bir araba ve sâir çiftlik âlâtını iki yüz elli guruşa ve yine medîne-i Erzurum’da Câmi‘-i Kebîr mahallesinde vâki‘ bir tarafı İsmail Çelebi b. el-Hâc Ali mülkü ve iki tarafı sarrâc Hasan mülkü ve bir tarafı tarîk-i âm ile mahdûd fevkānî iki bâb oda ve tahtânî iki bâb oda ve kenîfi müştemil mülk menzilimi dahi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık oğlum mezbûr Halil Çelebi’ye iki yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ol dahi vech-i muharrer üzre iştirâ ve kabûl eyledikden sonra yine kazâ-i mezbûra tâbi‘ zikr olunan Kirahar nâm karyede vâki‘ lede’l-ahâlî ma‘lûmü’l-hudûd ve’l-kıt‘a tarla ve çayır yerlerini ve peçeneği ma‘rifet-i sâhib-i arz ile beş yüz bir esedî guruş bedel mukābelesinde ferâğ ve tefvîz, ol dahi tefevvüz ve kabûl eyledikden sonra semen-i mezbûr dört yüz elli esedî guruş ile bedel-i merkūm beş yüz esedî guruş ki cem‘an dokuz yüz elli esedî guruşu târih-i kitâbdan yedi yüz yirmi gün tamânında edâ etmek üzre te’cîl edip ol dahi ecel-i mezbûru kabûl eyledikden sonra emlâk-i mezbûreyi kabza ve arâzi-i mezbûreyi tasarrufa merkūm Halil Çelebi’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 12 yevm min Zilka‘de sene 1073.
Şuhûdü’l-hâl: Abdülgani Beşe, Mehmed Beşe seroda, Kenan Bey b. Abdullah, Ahmed Bey, İsmail Çelebi, Ahmed Efendi b. Abdülmennân, Ali Beşe, Selim Çelebi, Mustafa Çelebi, Nişancızâde el-Hâc Mehmed.
|